Read Batak Dairi Peddah 21 Bible Online

Peddah 21 - Batak Dairi bible

Peddah 21

¹Tosè bagè laè iatur JAHOWA asa marir barang mikè dok atèNa, bagi ma ngo Ia menatang pikiren raja.

²Karina pemaing jelma i, mendè ngo dok atèna tapi JAHOWA ngo mengantan nipergeddo ukurna.

³Lotien ngo bai JAHOWA pengelako mendè dekket bennar daripada karina pèlèen.

⁴Merdosa kalak perjahat i, kerna ikuasai ukur jukkat bak ndates ukurna.

⁵Rencana kalak ngkasah merembahken laba poncan; pemaing rudu-rudu merembahken kerogien.

⁶Kinibèak siso arap dalan bennar ndor ngo i mersep janah merembah jelma mi liang kubur.

⁷Jelma jahat oda uè menguèi hatoren hukum, menggagat bana mo ulah-ulahna.

⁸Jelma mersalah merèluk-èluk dalanna; jelma selloh dak ntèger ngo nggelluhna.

⁹Lotien ngo merian i soki pagu daripada rebbak dekket sinibages perlemmo atè mersoal.

¹⁰Jelma jahat sèkel maing kejahaten barang taba isè sambing pè oda ia mermasèh atè.

¹¹Hukumen bai jelma pengerèhèi, perguruen ngo i bai sikurang ukur. Mula ipesèngèt jelma pandè makin tambah mo kepandènna.

¹²Ibettoh Dèbata sintèger kalohon i ngo simasa i bages perjahat. Idabuh mo kalak perjahat i mi kemagoen.

¹³Barang isè oda mendengkohken kelsoh kalak sikekurangen oda ma ngo iperdatèken dèba ia mula mido pengurupen.

¹⁴Lako pemalapken laga dekket buritingen, sipsip mo taruhken siberèenken.

¹⁵Mula idalanken keadilen, simerpengelako selloh mengakap sennang, tapi jelma jahat mengakap terancam.

¹⁶Jelma siso uè mengèkutken dalan kepistaren kennah iakapi soh mi dunia kalak simatè.

¹⁷Jelma dak sèkel mersennang-sennang dak tong mo kurangen; jelma dak sèkel mangan meddem oda nung keloten.

¹⁸Mula ihukum JAHOWA jelma mbellang, oda ngo jelma selloh, tapi jelma jahat sinibagasen kesusahen ngo.

¹⁹Lotien diri merian i rambah lunglang, daripada rebbak dekket sinibages perungut-ungut dekket perlaga-laga.

²⁰Jelma mpantas dak nduma dekket silot bana; tapi jelma moto pesia-siaken hartana.

²¹Barang isè mengusahaken asa kesèntengen dekket ngkelleng atè iulaken, terolih kedamèen kesangapen dekket umur nggeddang.

²²Jelma bijak sanggup menaban kuta sinijaga tenterra mahantu; irumpakken ngo bekkas pertahanen asang-asang kalak i.

²³Lako pesidingken sinjahat, rana kennah mermanat.

²⁴Kalak jukkat dekket ndates ukur dak ngo mengeramin bana kurang ajar.

²⁵Jelma mahangkè siso uè mahan bahanna; memunuh dirina merkitè sèkel atèna.

²⁶Suntuk ari ia pellin memikirken tersèngèt kadè sinisèkelkenna. Balikna nola mula jelma sènteng ukurna uè mbuas merèken silot bana.

²⁷Oda lolo JAHOWA midah pèlèen jelma siso kasèa, terlebbih mula ipèlèken meradum niat meroha.

²⁸Siniindangken perluap oda ikettoki; tapi rana simemettoh simasa i ngo ipercayai.

²⁹Kalak bujur tok mi dirina; kalak jahat oda ibettoh mèla.

³⁰Oda lot kepandèen, kebijaken barang kepantasen sindorok mertahan i hadeppen JAHOWA.

³¹Mula pè i perjuhapen ilengkapi dekket kuda perang, JAHOWA ngo menentuken kemenangen.