Read Batak Dairi Peddah 22 Bible Online

Peddah 22 - Batak Dairi bible

Peddah 22

¹Lotien ngo tergerar mendè daripada harta mbuè; lotien ngo pekelleng-kelleng atè dèba daripada iberrèken mbuè pirak bak emmas.

²Sibèak dekket sincor lot sada kedosenna; JAHOWA ngo menghanaken kalak i karina.

³Ipesiding sipandè ngo mula lot idah mara; kalak sikurang ukur menerrusken merdalan nai sempa mo bana mara.

⁴Jelma simerkebiaren midah JAHOWA dekket sipeteruhken dirina, sennang, nduma ngo ia janah ipesangap dèba.

⁵Dak lot ngo togong-togong dekket mengerimrim i dalan jelma nggèduk; mula naing ko njuah-njuah pesiding mo karina i.

⁶Ajar mo dukak asa nggelluh rembang patut bana nai soh tua-tua pè bagi mo tong pernggelluhna.

⁷Irajai kalak sibèak ngo kalak sincor; irajai sipejualken ngo, kalak simerjual.

⁸Jelma simenuanken nggèduk, kemagoen ngo peranienna, ujungna pengelakona siso kasèa i mago mo maknè lot kuasana.

⁹Jelma merpengelako mendè ipasu-pasu JAHOWA, kumarna iberèken ngo dèba cinarina bai sikurangen.

¹⁰Pelaus mo jelma pergèduk, asa mentadi rubat, perselisihen dekket mersirèhè-rèhèen.

¹¹Jelma simbersih merperukuren bak melamlam mengerana, gabè supan-supan raja mo ia.

¹²Merkitè ipetarar luap dekket kegèduken jelma, ijaga JAHOWA mo perbinettohen bennar asa tong terpiara.

¹³Perhangkè sidak kom ibages; mendokken ranana, “Lot ngo biahat i gembar dalan i, tah ijerngem nola aku nahan.”

¹⁴Rana daberru sibabijalang tosè togong-togong; kalak sinipunguren JAHOWA masuk mi bagasen.

¹⁵Lekket dèng ngo kemotoen ukum bai anak-anak tapi rotan-rotan pengajaren maing mobah pengelakona.

¹⁶Barang isè naing bèak merkitè mengkilang kalak sincor dekket merrèken sibasa-basa bai sibèak ujungna dirina nola ngo gabè mpersuk.

¹⁷Dengkohken mo naing kuajarken bamu peddah kalak simpantasniasè! Pikiri mo ajarku.

¹⁸Sennang mo ko mula iradum-radumi ko ajarku ibagasen pusuh peratèenmu. Ai merkitè bagidi enggo dak kebbas ko mula naing ipergunaken ko ia.

¹⁹Kuajarken i bagèndari bamu, kumara sèkel aku percaya ko bai JAHOWA.

²⁰Tellupuluh bagè peddah pengajaren enggo kusurat lako bamu imo peddah penga- jaren merisiken perbinettohen deket sipesèngèt merandal;

²¹dekket simengajarken bamu kebenaren situhuna. Mula ikusoi dèba kono luas, ndorok mo ialoi kono.

²²Ulang rogi baing kalak sincor, kemulihken kètèk ia; janah ulang ikilang ko hak simpersuk i kerungguen.

²³Kumarna JAHOWA ngo menarapi perkara kalak i dekket memostep kessah kalak simengkilang kalak i.

²⁴Ulang ko mersaor dekket kalak simurah melaga dekket ndor punguren.

²⁵Asa ulang langket bamu, janah oda nè ndorok terpatakken ko kecemmalenna i.

²⁶Ulang jalapi menggarar utang ni dèba.

²⁷Mula oda tergarar ko cingki i podo ari, nggèut ngo pedemmenmu pè irampasi.

²⁸Ulang lompat perbalengen tanoh sienggo ipatokken empungmu.

²⁹Nung ngo idah ko kalak sipandè mengu- laken bahanna? Kalak sibagidi i istana raja ngo ipengulaken, oda ngo i bages jelma keteremmen.