Read Batak Dairi Peddah 23 Bible Online

Peddah 23 - Batak Dairi bible

Peddah 23

¹Mula rebbak kundul mangan ko dek- ket kalak mbelgah, èngèt mo isè ia.

²Mula mbisa kin pè kono mangan, antak mo bakkomi.

³Ulang hakai pangaen simerasa sinihantarkenna i, tah bakunè lako mengoji kono ia.

⁴Ulang gongken merpunuk asa ndor bèak. Pettadi niatmu bagidi.

⁵Kumarna ndorok ngo mersep hartamu ibagasen singkèrjep mata, nidokdok ngo ia merkabeng gabè ngkabang mi abang-abang i bagè manuk-manuk rajawali.

⁶Ulang mangan rebbak dekket kalak cekkit. Ulang ma sèkel kipangan panganna sintaboh i.

⁷Ai uè ngo ia mendokken, “Ma- ngan kita; tambahi mo,” keppèken ukum ukurna oda ngo bagi. Katana mendè-mendè, tapi ukum ukurna laèn ngo.

⁸Nakan sienggo nitellenmi, iutahken kono nola mo janah karina katamu selloh i oda lot gunana.

⁹Ulang pesèngèt kalak simoto; oda ngo ihargai sipesèngètmu i.

¹⁰Ulang ompat baleng tanoh tading-tadingen barang memuat tanoh milik dukak melumang.

¹¹Kumarna JAHOWA ngo mergegoh menolong, ia ngo menarapi kalak i lako mengalo kono.

¹²Peratè-atèken siniajarken gurumu janah dengkohken mo kata-kata perbinettohen.

¹³Ulang antak mengajari dukakmu. Mula iligas ko pè ia dekket kettang, oda ngo mèter matè ia.

¹⁴Ai irotan kono pè dagingna i asa maluah ngo ia i kemagoen nai.

¹⁵Alè pa, lolo kalohon ngo aku mula bijak kono.

¹⁶Bangga mo aku mula kudengkoh iruapken ko kata ketègerren.

¹⁷Ulang ncian ukurmu midah jelma perdosa. Dak uèi mo Dèbata asa merlaba olih ko i ari podi.

¹⁸Dekket asa ulang siasia pengharapenmu.

¹⁹Dengkohken mo alè pa! Bijak mo ko. Tuhu-tuhu mo perdatèken pernggelluhmu.

²⁰Ulang ko mersaor dekket kalak permabuk barang nahaka,

²¹kumarna gabè kalak sincor ngo kalak i. Mula meddem sambing ngo ko, oda ndekkah nèngè meroles compang-camping mo ko.

²²Uèi mo bapamu; ai kerna ia ngo asa lot ko. Mula enggo tua-tua inangmu pacidah mo ipesangap ko ia.

²³Pengajaren sènteng, kepistaren, peddah dekket kepantasen — selloh ngo itokor karina i, tapi mahargasu mula lako dèaen.

²⁴Lolo ngo sada bapa mula merpengelako merandal dukakna, sampang atèna mula bijak dukakna.

²⁵Katerra pè dak sampang mo atè bapamu dekket inangmu midah ko; katerra pè meroang-oang mo nemmu daberru simenubuhken ko.

²⁶Perdatèken mo mendè janah codi mo pernggelluhku alè pa!

²⁷Daberru luhlah sibabijalang tosè ngo i togong-togong merbahaya.

²⁸Mengerimrim ngo kalak i bagè penamun janah mèduk ngo iabin daholi gabè perlangkah julu meddem.

²⁹Ibettoh kono ngo kadè masa bai kalak simengènum pola mbuèsu, dekket nggati mengènum ènumen mperngis? Susah ngo ia janah mpersuk. Dak merselisih ngo ganaenna dekket kekelsohen. Matana mbara, dagingna ugahen, keppèken ndorok ngo ipesiding karina i.

³¹Ulang ketagien ko mi pola, mula pè rupana mengabin ukur janah merkillok ia taridah ibas galas janah ntaboh menjarir i bergeng.

³²Siceggen sibarembenkenna bagè cara itebbi nipè merbisa mo perasaenmu.

³³Mengget mo matamu, ukurmu merbulut dekket babahmu pè cengamen.

³⁴Perasaenmu tosè bagè i punca tihang keppel i tengah laut; takalmu bagè ipekpekki, janah kono jumèbè-jèbè.

³⁵Nai nimu mo, “Rupana itendel janah iparap dèba ngo aku, tapi oda kuèngèt kadè masa. Anangè, dak iondoh kuakap matangku! Mènum nola mo aku!”