Read Batak Dairi Peddah 25 Bible Online

Peddah 25 - Batak Dairi bible

Peddah 25

¹Bang èn pè peddah bai si Salomo nai ngo sinisurat pugabè i istana si Hizkia raja Juda.

²Dèbata imuliaken kemulihken sinirusiakenNa; raja ipesangap kemulihken pengerisikenna.

³Bagè laut mbages dekket langit ndates i, bagi ngo pikiren raja oda terasak i.

⁴Pebersih lebbè pirak ibas tasikna nai, nai ipè asa ndorok merandal iteppa peneppa i.

⁵Pelaus mo pengajari latlat i istana nai, jadi ntegguh mo pemerèntahen kumarna adil i.

⁶Naing mo ncerrep ukur mula menghadep raja ulang merlagak bagè jelma mbelgah.

⁷Lotien idokken laus mi bekkas lebih mersangap daripada idokken berèenken bekkasmu i taba kalak lebih mersangap.

⁸Ulang rudu-rudu merembah perkara mi kerungguen, kerna mula terbukti i podi ari kono salah kadè nèngè mo ndorok ibaing ko?

⁹Mula salah paham dekket denganmu, pelias mo pellin dekketsa, tapi rusia sidèban ulang ibuka i ko nola.

¹⁰Asa ulang idokken dèba nanjolo bibir ko janah gerarmu gabè meroha sidekkah nggelluh ko.

¹¹Rana tuhu siniruapken tupung katikana tosè bagè kalto-kalto emmas i babo pinggan pirak.

¹²Pincang-pincang kalak bijak taba kalak siuè mendengkohken, codi bage cincin emmas, barang cimata.

¹³Pesulaken bujur maing lolo atè sipasulakken, tosè bagè laè mbarngap bai simerani i juma peranien.

¹⁴Jandi siso ituhui, tosè bagè langit mergiro-giro dekket angin pertanda oda roh udan.

¹⁵Kesobaren meradum rana melamlam memaing tok kalak simerkuasa dekket mengapusken karinana peraloen.

¹⁶Ulang pangan tenggoli mbuèsu, asa ulang gabè moyang atèmu.

¹⁷Ulang nggati ko mi sapo gembar bagesmu asa ulang ngkapil bak ceggo atèna bamu.

¹⁸Tukas siso tuhu ndorok mematèken tosè bagè peddang, palu-palu barang panah ntajem.

¹⁹Mengketoki penelbuh tikan pècet dosken bagè mengilkili dekket èpen mogot-ogot barang merdalan dekket nènèh kèpang.

²⁰Mernangen taba kalak sibonek tosè mengkelanjangisa tikan cuaca mbergoh, tosè memaing acem mi ugahna.

²¹Mula melèhè musuhmu berrè ia mangan; dekket mula muasen ia berrè mo ia mènum.

²²Merkitè bagidi gabè mèla mo ia ibaing ko nai ipasu-pasu JAHOWA mo ko.

²³Angin i julu nai pasti merdengan udan; bagi ngo perkata tondal perohken laga bak ukur nggettem.

²⁴Lotien ngo sada diri merian i soki pagu daripada rebbak sada sapo dekket sinibages perubat-rubat.

²⁵Mendengkoh berita merandal, i nagerri ndaoh nai bagè mengènum laè mbarngap tikan muasen diri.

²⁶Jelma selloh petaluken dirina taba perjahat bagè talaga melamun barang laè mata-mata melètuk.

²⁷Oda selloh mangan tenggoli mbuèsu, bagi ma ngo oda selloh memoji-moji ngkatepsu.

²⁸Jelma siso ndorok mengantak dirina, tosè bagè kuta sienggo merumpak pertahanenna.