Read Batak Dairi Peddah 26 Bible Online

Peddah 26 - Batak Dairi bible

Peddah 26

¹Bagè udan tikan mosin leggo, dekket baho i mosin mpeddas, bagi ma ngo oda patut bai jelma moto pemoji-mojien.

²Bagè manuk-manuk ngkabang mayap-ayap, bagi ngo sumpah oda mengenna bai jelma siso mersalah.

³Kalodè kennah ikontam, kuda kennah iligas, bagi ngo jelma moto kennah iligas.

⁴Kalak simengaloi kuso-kuso jelma bungur dos ngo motona dekket jelma bungur i.

⁵Kuso-kuso jelma moto kennah nialoen dekket pengaloi moto ma, asa satdar simengkusoi, oda ngo keppè pandè ia bagè sinidok ukurna.

⁶Pasulakken sada kalak simoto merembah berita dosken memènggel nèhè sendiri dekket mengaleng mara.

⁷Bagè jelma pang-pangen memakè nèhèna, bagi ngo jelma lengah mengeruapken peddah.

⁸Memoji jelma lengah, tosè mengerakutken batu mi arimbalang.

⁹Bagè kalak mabuk mengkurik dori i tanganna nai, bagi ngo jelma moto simengeruapken peddah.

¹⁰Barang isè maing mengula jelma moto barang pè sembarang jelma kennah mengerogiken mèduk jelma.

¹¹Bagè biang kipangan utahna, bagi ngo jelma moto mengulaki kemotoenna.

¹²Lotien dèng ngo jelma moto kalohon daripada jelma simendok atè pandè ia.

¹³Perhangkè dak ndong-ndong ngo i bages; nina, “Biahat nai ngo i ruar, tah bakunè ijerngem nola aku i tengah ndalan.”

¹⁴Bagè pèntu merkessing ibas ondar-andirna, bagi ma ngo perhangkè merkessing-kessing i pedemenna.

¹⁵Lot ngo jelma sun mo hangkèna menulangken nakan mi babahna pè oda roh gèutna.

¹⁶Pandèen dèng ngo perhangkè i dok atèna daripada pitu kalak memaing pengaloi situhuna.

¹⁷Kalak simengantoi perubaten siso urusenna, dos mo i dekket kalak simenangkup biang meriar ipas copingna.

¹⁸Jelma penipu mula mendokken, “Pellin mergait-gait sambing ngo aku,” tosè mo i dekket jelma gila mengkialken sinjata merbahaya.

²⁰Mula enggo kerri sebban, mèntep mo api, mula oda nè lot singgeddang dilah, perubaten pè mentadi.

²¹Bagè harang bak kayu maing api dak tong lakat, bagi ngo kalak perubat-rubat memaing perukuren dak hangat.

²²Asung-asung kelpu ngo rasana, lolo ngo jelma menelensa.

²³Bagè koden tanoh iseppuh dekket pirak, bagi ngo kalak perkata ndalit, tapi ukurna jahat.

²⁴Perkosom ndalit ngo ranana, tapi dom akkal-akkal ngo ukurna.

²⁵Mula pè ia ramah, ulang ko tok bana; kumarna kosom ngo menguasai ukurna.

²⁶Mula pè iboniken kosomna, karina kalak ngo mengidah kejahatenna.

²⁷Barang isè mengkurak geddung menogongi sidèban, ia ngo ndabuh mi bagasen. Barang isè menggulang batu asa itinggang sidèban ia sendiri ngo itinggang batu i.

²⁸Mengeluapi kalak dos ngo i dekket mengkosomisa. Kata ndalit maing roh mara.