Read Batak Dairi Peddah 27 Bible Online

Peddah 27 - Batak Dairi bible

Peddah 27

¹Ulang èndèlken tersèngèt ari barem- ben, kumarna oda ibettoh ko kadè sinaing masa podi èn.

²Ulang poji dirimu sendiri, lotien mo kalak mengulaken i, imo kalak siso tinandaenmu.

³Menahangen dèng ngo kersik dekket batu mertimbangken ncio atè ibaing jelma bujur.

⁴Ntengam ngo laga i janah menghancurken, tapi merimbangken cemburu, isè mo menahan?

⁵Lotien dèng ngo rana nterrang-terrangen, daripada ngkelleng siso ihuapken.

⁶Dengan mengeligas merdengan kelleng atèna tapi musuh mengkaol merdengan bisa.

⁷Mula bessur, tenggoli pè itulak, mula melèhè simpagit pè iturhap.

⁸Jelma simenadingken bagesna, bagè manuk-manuk menadingken asarna.

⁹Tosè bagè minak baungkus pesennangken atè bagi ngo keniselloh dengan peloloken pusuh peratèen.

¹⁰Ulang lupaken denganmu barang dengan-dengan bapamu. Ibagasen posek ulang pido pengurupi kaka-anggimu; mergunaen ngo sinigembar sapo ndessing daripada dengan sibeltek ndaoh merkellang.

¹¹Alè pa, kennah bijak ngo ko asa sampang atèngku janah kubettoh mengaloi mula iramin.

¹²Kalak pandè ipesiding ngo mula idah bahaya, jelma moto ijuljulken ngo merdalan nai sempa mo bana mara.

¹³Barang isè uè menaggung utang sidèban selloh ngo ibuat milikna mahan gadè jandina.

¹⁴Barang isè mendokken njuah-njuah taba denganna dekket sora nggang iètong ngo i sumpah.

¹⁵Sinibages perubat-rubat dos ngo i bagè sora udan meruari.

¹⁶Oda terdokken ia asa sip, bagè angin oda terbellat dekket minak oda tergellem.

¹⁷Tosè bagè waja menggarut waja bagi ma ngo jelma merguru bai denganna jelma.

¹⁸Isè makani kayu kennah ipangan ngo buahna. Ihargai ngo naposo mula dak ikebbasi ngo tuanna.

¹⁹Bagè laè peteridahken abèmu, bagi ngo perukurenmu pacidahken kedirinmu.

²⁰I dunia kematèen dak lot ngo bekkas; bagi ma ngo sinipergeddo jelma oda merbatas.

²¹Emmas dekket pirak ioji ipas api, tertandaen ngo jelma arap carana tersèngèt poji-poji.

²²Mula pè ibatbat jelma i tuk gegohna, oda nggèut mbalang ukum kemotoenna.

²³Piara mo pinakanmu mendè-mendè,

²⁴kumarna oda ngo hot kinibèak, salang kuasa memerèntah oda menettap soh mi amman sumendah.

²⁵Dukut sinijuma dekket sinnidelleng isabi dekket ipepulung mahan pangaen pinakanmu i, tapi ninganna bagidi turah nola ngo dukut rembaru.

²⁶Ipas bukbuk biri-birimu nai dapet kono ngo pakèen, dekket arap riar tokor dèba kambingmu nai, ndorok tertokor ko tanoh rembaru.

²⁷Arap kambingmu sidèban nai terolih susu ngo ko dekket dukak-dukakmu bang naposo-naposomu.