Read Batak Dairi Peddah 28 Bible Online

Peddah 28 - Batak Dairi bible

Peddah 28

¹Jelma perjahat mperrus oda lot menjalangisa, tapi kalak bujur berrani ngo bagè singa.

²Mula merdosa bangsa, rajana mergancih-gancih; mula mpantas raja, mergong mo bangsa i janah dak nduma.

³Penguasa simengkilang jelma ncor, tosè bagè udan darèdè mencèdai peranien.

⁴Barang isè mengelausken hukum menumpak kalak perjahat barang isè menjamotken hukum mengalo kalak pengelaplap.

⁵Hukum kesèntengen oda iantusi kalak durhaka, tapi tuhu-tuhu ngo iarusi kalak simenembah JAHOWA.

⁶Lotien ngo jelma ncor tapi mendè ukurna daripada kalak bèak tapi nggèduk ukurna.

⁷Anak perana simenjamotken hukum, imo jelma merroka. Tapi jelma simersupan dekket kalak pemboros, pemèlaken bapana.

⁸Barang isè bèak kumarna bunga kèpèng dekket muat laba oda lot nè sibarna, gabè laus mo kinibèakna i taba jelma simermasèh atè bai jelma ncor.

⁹Mula oda iuèi ko Dèbata, sodipmu pè moyang mo atè Dèbata.

¹⁰Barang isè mengajar-ngajari jelma bujur asa mengulaken jahat, ia sendiri ndabuh mi togong-togong piatat merjebak. Jelma mpènter atèna ipasu-pasu ngo soh sennang ia.

¹¹Kalak sibèak, ia ngo dak sipandèna katèna, tapi ibettoh kalak sincor simerbeddi ngo, isè ia situhuna.

¹²Mula jelma bujur merkuasa, karina kalak mengkelemoken, tapi mula perjahat memerèntah, sinterrem ciboni kerna buradan.

¹³Barang isè moniken dosana oda gabè perlabaen, barang isè mengakui dekket menadingken dosana, masèh ngo atè JAHOWA.

¹⁴Dak pesangap mo JAHOWA asa sayurntua kono. Mula ialo kono ngo Ia gabè mermara mo ko.

¹⁵Jelma jahat simerkuasa taba kalak sikekurangen, tosè bagè biahat merngengngeng barang geppul menjerngem.

¹⁶Raja simendersa sidèban, oda sènteng perukurenna; raja simernggogo atè midah perkilangen mertahun-tahun ngo i memerèntah.

¹⁷Jelma pembunuh, dak bagè iletlet pengakapna soh mi ajalna; isè pè oda terbaing mengambatisa.

¹⁸Jelma siso mertikas nggelluhna, meluah ngo ia. Jelma dak merèluk-èluk nggelluhna, kennah ndabuh ngo ia.

¹⁹Peruma-uma singkasah mahan bahaen cukup ngo pangaenna, kalak simenia-niaken tikki gabè kurangen ngo ia.

²⁰Jelma bujur ipasu-pasu JAHOWA, tapi jelma sèkel ndor bèak, oda maluah tan hukumen.

²¹Oda selloh membèda-bèdaken jelma; tapi lot ngo hakim memaing siso puna-puna pellin lako muat riar bana.

²²Jelma cekkit sèkel naing ndor bèak ia oda satdar ia ndor mo sempa kinicor mi dirina.

²³Jelma siuè memincang ujungna lebbih ipesangap daripada kalak perkata ndalit memanggar-manggar.

²⁴Barang isè menangko harta bapana janah oda dosa katèna i, dos ngo ia dekket penangko sidèbankenna i.

²⁵Simengaum mi dirina petebennaen perubaten merlabaen ngo ko mula percaya bai JAHOWA.

²⁶Barang isè mengasangken pendapetna sendiri, oda ngo selloh ukurna i, barang isè menguèi peddah simpantasniasè, ia ngo maluah.

²⁷Barang isè memerèken taba kalak sincor oda ngo kurangen. Barang isè memètut matana mi keperluen sincor, kenna simpetta JAHOWA.

²⁸Mula jelma jahat gabè raja, ginemgem laus ciboni; mula jelma jahat binasa jelma ntèger ngo menguluken sumaka-saka.