Read Batak Dairi Peddah 29 Bible Online

Peddah 29 - Batak Dairi bible

Peddah 29

¹Barang isè ipesèngèt keppè tong jèngèng i sada tikki mago mo ia janah oda nè terpelias mengolihi.

²Mula jelma bujur memerèntah, ginemgem meria-ia. Tapi mula kalak jahat merkuasa, ginemgem menggong kinidersa.

³Barang isè merkelleng atè midah kepantasen, pesennangken atè bapana. Barang isè campur dekket sibabijalang, pesia-siaken kèpèngna.

⁴Mula ipecèndek raja ngo ketègerren, ntegguh ngo nagerrina. Tapi mula riar ngo takina, rèboh mo nagerrina.

⁵Barang isè memanggar denganna dos ngo i dekket menogongi dirina.

⁶Jelma jahat tersengkik ibaing dosana, jelma bujur sennang janah lolo ukurna.

⁷Jelma mendè memettoh hak jelma kètèk tapi jelma jahat oda iarti sibagidi.

⁸Kalak pengerèhè ndorok mengeributi kuta, tapi kalak sipandè pemènakken simasa.

⁹Mula perkara kalak pistar dekket kalak moto, pellin mengamuk dekket tertaba sambing ngo kessa simoto i gabè maing keguluten.

¹⁰Dak ceggo ngo atè simenepcep daroh midah simpènter atè, tapi dak ngo ia iurupi jelma simendè atè.

¹¹Kalak moto melaga ngo terang-terangen, tapi kalak bijak sobar ngo janah lagana pè ipelamlam.

¹²Mula idengkohken raja berita siso tuhu, pugabèna pè gabè jahat mo karina.

¹³Sincor dekket simendersasa, lot ngo perdemuenna; taba kalak i sidua iberrè JAHOWA ngo mata, asa idah cuhaya kenggeluhen.

¹⁴Mula ibèla raja ngo hak jelma kèdèk mertahun-tahun mo ia dak tong memerèntah.

¹⁵Pengajaren dekket pincang-pincang, maing jelma gabè pantas. Mula dak tong iuèi pengidoen dukak, nggèut ngo i pemèlaken inangna.

¹⁶Mula merkuasa jelma jahat pengelausien mertambah. Tapi sanga ngo idah jelma bujur perjahat i tumpat.

¹⁷Ajari mo dukakmu, asa ibaing sennang atèmu, janah peloloken ukur bamu.

¹⁸Bangsa siso menguèi peneguneguen JAHOWA imo gabè bangsa sidom keguluten. Sayurntua mo jelma siemnguèi pati-patien JAHOWA.

¹⁹Hamba oda terajaren kum pellin merkitè kata. Iarusi ngo nemmu, tapi oda uè ia memperatè-atèkensa.

²⁰Buèen ngo harapen jelma leppik i daripada jelma pengerana siso lebbèen ipikiri.

²¹Hamba siniuè-uèen i kèdèkna nai ujungna gabè jèngèng nola ngo i.

²²Jelma simurah melaga maing mèduk jelma merubat dekket merdosa.

²³Jelma jukkat kennah ipeterruh; jelma percerrep ukur gabè terpoji.

²⁴Barang isè kongsi dekket penangko mengkecegoken dirina sendiri ngo. Mula mengaku ia i kerungguen ijalo mo hukumen. Tapi mula sip sambing ngo ia kenna sumpah JAHOWA mo ia.

²⁵Buradan midah pendapet jelma, maing roh kesusahen. Percayai mo JAHOWA, asa ko merkesennangen.

²⁶Mèduk ngo kalak muat-muat ukur taba penguasa tapi ukum merrè kesèntengen pellin JAHOWA ngo kessa.

²⁷Jelma bujur ceggo ngo atèna midah jelma jahat; jelma jahat nggogo atèna midah jelma bujur.