Read Batak Dairi Peddah 3 Bible Online

Peddah 3 - Batak Dairi bible

Peddah 3

¹Ulang ko lupa mi sienggo kuajarken bamu alè pa. Dak èngèt mo katangku,

²asa nggeddang umurmu janah merdamè-damè nggelluhmu.

³Kennah hot ngo ko percaya janah setia taba Dèbata dekket taba denganmu. Èngèt mo i janah pennep ibas ukurmu,

⁴asa isennangi janah maharga ko bai Dèbata dekket bai jelma.

⁵Percayai mo JAHOWA ibas karina pusuh peratènmu, janah ulang asangken kepantasenmu.

⁶Dak èngèt mo JAHOWA ibas karina ulaenmu, asa ituduhken bamu bakunè cara nggelluh simendèna.

⁷Ulang iètong ko pandèen ko daripada situhuna; uèi mo JAHOWA janah pesisi mo kejahaten.

⁸Pemaingmu i ngo gabè dosken tambar bamu pemalumken dagingmu dekket pesampangken ukurmu.

⁹Pesangap JAHOWA janah pèlèken bana simendèna daripada karina harta milik dekket hasil tanohmu,

¹⁰asa dom pagè kebenmu, dekket laè anggur meriba-iba, gabè oda cukup nèngè bekkasna pemeneppenna.

¹¹Mula iajari JAHOWA ko alè pa, jalo mo i dosken sipesèngèt, janah ulang mendellè ukurmu kumarna pengajarenNa i.

¹²Iajar JAHOWA ngo jelma kekelengen atèna, tosè bagè partua mengajar dukak lemmo atèna.

¹³Merlaba olih ngo jelma simpantasniasè dekket terolih pengarusien.

¹⁴Buèen dèng ngo laba olihna daripada pirak, janah mahargaen dèng asa emmas.

¹⁵Mahargaen dèng ngo kebijaken daripada batu intan; karina sinipergeddomu pè oda terpedos mi sidi.

¹⁶Kebijaken ngo merèken bamu umur nggeddang, kinibèak dekket kesangapen.

¹⁷Kebijaken ngo maing sennang janah mer- damè-damè nggelluhmu.

¹⁸Barang isè merdangaen mi kebijaken ia ngo mengerasai nggelluh situhuna janah sennang.

¹⁹Merkitè kebijaken ihanaken JAHOWA dunia; merkitè kepantasenna ipekimbang langit i bekkasNa.

²⁰Merkitè perbinettohenNa ibahan mata laè i terruh tanoh i mpustak janah mengarirken laèna dekket hembun i langit i mencurahken laè mi tanoh èn.

²¹Kumarnana i, merdangaen mi kepistaren mo ko dekket mi pertimbangen seppè alè pa! Ulang paluahi ia,

²²nai njuah-njuah mo nggelluhmu — merandal janah pesennangken ukur.

²³Nai mènak mo ko merdalan janah oda uè tertuktuk.

²⁴Oda pella rembekbekken ko lako meddem, nai lènek mo perpeddemmu suntuk berngin.

²⁵Oda pella buradan ko mi olpek sinaing sempa sintempu bagè topan lako mengelentem jelma perjahat.

²⁶Dak ijagai JAHOWA ngo ko. Oda ibelli ko terungkup mi bagasen togong-togong.

²⁷Mula terbaing kono memaing merandal taba kalak simemerluken kinimerandalmu i, ulang jua lako mahanken i.

²⁸Ulang pella dokken taba denganmu asa ipèma baremben, mula terurupen kono ia bagèndari.

²⁹Ulang sura-surai mengerogiken denganmu simerian i gembermu dekket sitok bamu.

³⁰Ulang merselisih mula oda lot kulih sebabna dekket kalak siso pennah memaing jahat bamu.

³¹Ulang cian ukurmu taba kalak simaing kegegohen, janah ulang codi pengelako kalak i.

³²Kerna nggogo ngo atè JAHOWA midah kalak simaing jahat, tapi ncelket ngo Ia taba kalak simpènter atè.

³³Isumpahi JAHOWA ngo bages kalak perjahat, tapi ipasu-pasu ngo bages kalak simenguèisa.

³⁴Nggogo ngo atè JAHOWA taba jelma sindates ukur, tapi ipasu-pasu ngo kalak sincerrep merukur.

³⁵Makin baungkus ngo gerar kalak simpantasniasè, tapi ukum kalak moto makin terèhè.