Read Batak Dairi Peddah 30 Bible Online

Peddah 30 - Batak Dairi bible

Peddah 30

¹Èn mo peddah pengajaren siniruapken si Agur anak si Jake i kuta Masa nai: “Ledja aku, alè Dèbata, ledja aku! Enggo kerri gegohku!

²Moto ngo aku bagè pinakan; oda lot merpengarusen.

³Oda nung kuguruken kepistaren, cituk poda kubettoh tersèngèt JAHOWA.

⁴Isè nung jelma menangkih susur sorga? Nung ngo ia menggellem angin ipas tanganna, dekket maluti laè ipas bajuna, barang petettahken perbalengen dunia? Isè ngo ia, janah isè dukakna? Pasti kono ngo mettohsa!

⁵Iteppati Dèbata ngo karina jandiNa. Bagè tambeng-tambeng ia bai karina siroh culèndung baNa.

⁶Mula itambahi ko kadè sinidokkenNa, nai ipincang mo ko dekket asa ibuktiken perluap ngo kono.”

⁷“Ialè Dèbata, kupidoken sinderrang madèng matè aku, berrèken mo bangku sidua bagè èn.

⁸Ulang nemmu aku mengeruapken kata lèas dekket luap, janah ulang belli aku ncor barang bèak. Berrèken mo bangku pellin sikuperluken sambing.

⁹Kerna mula bèak aku, tah bakunè gabè kudokken, oda perlu kono bangku. Nai mula ncor aku, tah bakunè gabè menangko aku gabè mekemmer gerarmu.”

¹⁰Ulang menukasi sada kalak hamba bai indukna, asa ulang isumpahi ko bak idokken mersalah.

¹¹Lot ngo kalak menumpahi bapana janah oda ihormati inangna.

¹²Lot ngo kalak mengètong mbersih dirina, keppèken melamun kalohon ngo ia.

¹³Lot ngo kalak mengakap dirina selloh kalohon — sondel kinisellohna!

¹⁴Lot ngo kalak mencari pangaen dekket cara kejam; mengoto-ngotoi kalak ncor dekket kalak ndotè.

¹⁵Dua ngo dukak sipenepcep daroh; duana mergerar “Lako bangku!” Lot ngo empat bagè oda merkebias-biasen:

¹⁶dunia simatè, daberru siso nung tubuh-tubuhen, tanoh ngkerrah dak sèkel taba udan, dekket api simendilat misèn mi sadoi.

¹⁷Mata kalak simenèrèngi bapana janah haib iakap menguèi tennah inangna patut ambusenken mi ruar asa ipagut manuk-manuk kak matana dekket ipangan keliki bangkèna.

¹⁸Lot ngo empat bagè mahal kalohon kuakap mengarusi:

¹⁹manuk-manuk rajawali simerkabangen i abang-abang, nipè simenjoror i babo batu karang keppel simerlayar i tengah laut mbellang, dekket simpasang anak perana bak simerbaju mersikekelengen atè.

²⁰Bagèen mo akkal daberru siso setia taba sinibalèna: Enggo kessa ia merkendangen, mangan mo ia nai ilap mo babahna, idokken mo, “Ai so lot merkadè aku!”

²¹Lot ngo empat bagè oda terjalo ukur i suberri dunia èn:

²²hamba gabè mbangkit raja dapet simoto karina nipercintana

²³sada daberru sijahè tapi oda ngkelleng atè ndèba bana, sada hamba daberru simengerampasi hak bindorana.

²⁴I dunia èn lot ngo empat bagè binatang sikètèkna tapi pandè kalohon, imo:

²⁵Semmut, binatang siso mergegoh, tapi ipèmaken ngo panganna tikan mosin leggo.

²⁶Pelanduk, binatang ndotè, tapi ibahan ngo bekkasna i delleng batu.

²⁷Balang, binatang siso lot rajana tapi meratur ngo ia merbaris.

²⁸Cecak, binatang siso ndorok icekkak dekket tangan, tapi lot ngo ia i istana raja.

²⁹Lot ngo empat bagè lekket i ukur mula niperdatèken ia merdalan, imo:

³⁰Singa, binatang simergegohna ipas karina binatang janah oda gentar meradepken barang kadè pè.

³¹kambing tonggal, manuk jagur merdalan dolngah dekket raja i lebbè ginemgemna.

³²Mula kumarna kemotoenmu mertaki ko ibas ntudak ukurmu memaing ulah-ulah jahat, jaga mo!

³³Ai mula ikocok ko susu, dapet ko mo mentèga. Mula ipalu ko ègung ndèba, karuar mo daroh. Mula itebennai ko laga, dekket mo kono merubat.