Read Batak Dairi Peddah 31 Bible Online

Peddah 31 - Batak Dairi bible

Peddah 31

¹Enda mo kata sinipeddahken inang si Lemuel raja Masa taba anakna,

²“Alè pa, tampuk pusuhku, sikutubuhken kerna ialoi sodipku. Kadè mo ndia kudokken bamu?

³Ulang ipehamburken barang ipesia-siaken ko gegohmu taba daberru. Enggo mèduk raja ncèda kumerna daberru.

⁴Èngèt mo alè Lemuel! Mènum pola dekket ketagien ènumen mperngis oda selloh i bai raja.

⁵Ai mula mènum simperngis raja, lupa mo ia mi hukum janah oda nè isarihken hak kalak sindotè.

⁶Ai bai kalak sindersa dekket simelui ngo ènumen mperngis.

⁷Mènum kalak lako mengelupaken kinicor dekket kinipersahna ngo.

⁸Bèla mo kalak i siso ndorok membèla dirina. Urupi mo karina kalak siso mersima-sima.

⁹Legenni mo kalak sincor dekket kalak sitertèndes.”

¹⁰Sinibages pandè mahal ngo tulusen; mahargaen ngo ia daripada intan berlian.

¹¹Oda kurangen kadè sinibalèna, kumarna tok ngo ia tabasa.

¹²Oda nung ia maing jahat taba sinibalèna, sidekkah nggelluhna dak tong ngo mendè ibaing bana.

¹³Ngkasah ngo ia pepulungken kerrih dekket bukbuk biri-biri nai iempet ngo lako menennuni.

¹⁴Roh ngo ibaing pangaen i sindaoh nai, bagè pemaing keppel-keppel saudagar i.

¹⁵Njengkas kalohon ngo ia ndungo lako memahan pangaen bai pengisi bagesna, dekket membagiken ulaen bai naposona.

¹⁶Itulusi ngo sinterpuk tanoh, nai mèter itokor; iusahai mo serambar pekken anggur i pendapetenna nai.

¹⁷Ikebbasi ngo dirina lako mahan bahaen tuk gegohna.

¹⁸Ibettoh ngo karina sinibaingna, menguntungken mengula ngo ia soh mbages berngin.

¹⁹Menali bennang ngo ia dekket oles pè itennun ma.

²⁰Oda peddik ia taba sikekurangen; merbasa-basa ngo ia taba simemerluken pertolongen.

²¹Oda rembekbekken ia mula pè roh mosin mbergoh kumarna lot ngo enggo baju ngkapal bai sisimpangansa.

²²Ia sendiri ngo membayu belagenna kaèn maharga mbara-mbèrèng ngo pakènna.

²³Sinibalèna kalak termurmur ngo ma — imo sada kalak ibas pengulu kuta.

²⁴Itennun ngo oles dekket tali abak nai idèa mo i taba pertiga-tiga.

²⁵Metunggung ngo ia janah ihormati; janah oda pella rembekbekken ia tersèngèt ari podi.

²⁶Melamlam ngo ia mengerana; katana pè bijak ma.

²⁷Dak ngkasah ngo ia mengula dekket memperdatèken ulaen i bagesna.

²⁸Ipesangap dukak-dukakna ngo ia, dekket ipoji sinibalèna.

²⁹“Mèduk ngo daberru selloh,” “tapi kono ngo sisellohna bai kalak i nai karina,” nina sinibalèna.

³⁰Rupa mberru oda kettoken, kinimparas pè salpun; tapi daberru sidak menguèi JAHOWA patut terolih pemojien.

³¹Baing mo ali karina kinisellohna; daberru patut ihormati barang idikè sambing ngo ia!