Read Batak Dairi Peddah 4 Bible Online

Peddah 4 - Batak Dairi bible

Peddah 4

¹Kènè alè anak-anak, dengkohken kènè mo peddah bapa ndènè! Radum-radumi mo i asa asa bijak kono.

²Selloh ngo sikuajarken bamu èn, kumarna i ulang pis matamu midah i.

³Tikan kètèk dèng aku, anak sada-sada partuangku,

⁴iajar bapangku ngo aku. Nina, “Èngèt mo peddah pengajarenku i, ulang kono lupa. Ulaken sipesèngètku i, asa sennang nggelluhmu.

⁵Gabè kalak bijak janah pistar mo ko! Dak èngèt mo peddah pengajarenku janah ulang patakken.”

⁶Hargai mo kepantasen, nai iondingi kepantasen i mo ko; kekelengi mo ia nai ijaga mo ko asa dak tong mènak.

⁷Siperluna janah perlebbè ulaenkenmu imo mengusahaken asa gabè kalak bijak. Barang kadè pè ijalangi ko tapi siutamana imo mengusahaken asa dapet pengarusen.

⁸Jujung mo kepantasen i asa ipedates kono. Keppes mo ia, gabè roh mo ibaing kesangapen bamu.

⁹Iberèken mo bamu bunga merandal mahan rudangmu.

¹⁰Dengkohken aku alè pa! Mendè peratè-atèken peddahku asa nggeddang umurmu.

¹¹Enggo kuajarken kepistaren i bamu janah kubagahken cara nggelluh situhuna.

¹²Mula bagi ngo ko nggelluh, oda terhalangen dalanmu janah oda tertuktuk ko tikan lojang.

¹³Dak èngèt mo peddah sijalonmu bangkunai. Jamotken mo i selloh, kerna merkitè peddah i, merhasil ngo nggelluhmu.

¹⁴Ulang èkutken cara nggelluh perjahat janah ulang codi pengelako kalak i.

¹⁵Ulang berrè ukurmu taba kalak i. Pesisi mo kalak i janah puspusken merdalan!

¹⁶Ukum kalak perjahat oda dèng meddem kum madèng ibahanken siso mendè. Oda dèng naing meddem kalak i, kum oda dèng mencilakaken sidèban.

¹⁷Tosè bagè pangaen bak ènumen ngo kejahaten dekket kekejamen ukum bai kalak i.

¹⁸Gellap ngo dalan perjahat bagè gellap tikan berngin. Oda ibettoh kalak i tertuktuk janah tergempang ia. Tapi ukum dalan sibellusen kalak merpengelako mendè tosè bagè perbincar mataniari; makin ndekkah makin ncihur, ujungna nterrang mercala-cala.

²⁰Peratè-atèken mo ranangku alè pa! Dengkohken ajarku.

²¹Ulang patakken, tapi dak radum-radumi ibagasen ukurmu.

²²Kalak simengeradum-radumisa, nggelluh mo ia janah njuah-njuah.

²³Jaga ukurmu selloh-selloh, kerna ukurmu ngo menentuken nggelluhmu i podi ari.

²⁴Ulang ruap bamu nai siso tuhu. Pedaoh mo kata luap dekket kata mertujuen lako mengelalingken jelma.

²⁵Kennah teridah ngo i abèmu nai kebujuren ukurmu; oda perlu ko merpengelako merolip-olip.

²⁶Pikiri hanjar-hanjar sinderrang madèng iulaken, nai merhasil mo ko ibas karina bahaenmu.

²⁷Pedaoh dirimu ibas kejahaten nai, janah sènteng mo ko i nggelluhmu. Ulang menurimpang ko arap dalan ntèger nai.