Read Batak Dairi Peddah 5 Bible Online

Peddah 5 - Batak Dairi bible

Peddah 5

¹O pa, dengkohken aku! Perdatèken kebijaken dekket pengarusien sikuajarken bamu,

²asa ibettoh ko bakunè lako merembahken dirimu dekket mengerana bagè kalak simbages nahu.

³Rana daberru luhlah bagè tenggoli janah katana maing lekket atè,

⁴tapi mula enggo salpun karina, pellin simpagitna dekket kinipersah nai ngo kessa tading.

⁵Iruah ngo ko mi napa kematèen; dalan sinidalanenna pè mi kamatèen ngo patèna.

⁶Oda hot ia i dalan mi kenggeluhen; oda satdar ia enggo menirpang i dalan i nai.

⁷Kumarna i kènè alè dukak-dukak, dengkohken kènè mo ranangku janah ulang sia-siaken.

⁸Pedaoh dirimu bai daberru sibagidi nai! Ulang jolmiti bagesna.

⁹Mula mersaor ko dekket daberru sibagidi, bennè mo kesangapenmu janah kessahmu pè irampas kalak siso menandai masèh atè mo tikan posomu dèng.

¹⁰Kinibèakmu pè kerri mo ipangan sidèban janah upah kelejaenmu gabè milik kalak siso itandai ko.

¹¹Ujungna kekelsohen mo ko, makin kerri kessa dagingmu ipangan sakit.

¹²Nai nimu mo, “Nongalè, kasa ceggo kin atèngku midah pengajaren? Kasa kin mo oda uè aku ipesèngèt?

¹³Oda uè aku mendengkohken gurungku dekket oda uè aku menguèi kalak i.

¹⁴Keppè enggo merlèa aku i lebbè sinterrem.”

¹⁵Kumarna i bujur mo ko taba sinibagesmu janah tuduhken kelleng atèmu pellin bana sambing.

¹⁶Oda lot gunana bamu menulusi kinitaboh i taba siso sinibagesmu.

¹⁷Ai pellin bamu dekket sinibagesmu ngo kessa kinitaboh i, oda ngo dekket kalak sidèban.

¹⁸Kemulihken i naing mo nemmu merkesennangen ko dekket sinibagesmu sendiri; tulusi mo kinitaboh i bai simerbaju sienggo ikabini kono —

¹⁹simerbaju mberru janah liskat bagè ringgarung. Atèna mo kinimendè dagingna i dakdak memaing ko tergila-gila dekket kelleng atèna i maing kono mabuk.

²⁰Kadè gunana tergerrek ukurmu taba daberru sidèban i alè pa? Man kadè mercampur dekket daberru sibabijalang?

²¹Idah JAHOWA ngo karina siniulaken jelma. Barang mikè pè laus jelma i dak idatèken JAHOWA ngo.

²²Dosken togong-togong ngo dosa jelma i menengkik dirina sendiri.

²³Matè mo ia kumarna itulak ngo peddah. Kemotoenna imo merembahkensa mi kinimago.