Read Batak Dairi Peddah 6 Bible Online

Peddah 6 - Batak Dairi bible

Peddah 6

¹Tah bakunè alè pa nung kono merjandi dekket sada kalak lako menggarar utangna.

²Nai tah bakunè enggo tersengkik ko kemulihken ranamu dekket belbel ko kemulihken jandimu.

³Mula tuhu bagi alè pa, enggo mo ikuasai kalak i kono. Tapi bagèen mo carana asa ndorok maluah ko: Sudu mo mendahisa; mertuhu-tuhu mo ko midoken bana asa ipaluah ko.

⁴Ulang ko mèter meddem, janah ulang mengadi.

⁵Paluahi mo dirimu i togong-togong i nai bagè manuk-manuk barang ringgarung paluahken dirina bai perburu nai.

⁶Kalak mahangkè kennah iperatè-atèken cara pernggelluh perkis, janah merguru mo bana.

⁷Oda lot simenguluken perkis, oda lot pengulu barang mandurna,

⁸tapi ipepulung ngo bekkelna sidekkah peranien asa lot bekkelna mosin lèhè.

⁹Soh ndigan jelma mahangkè i dak meddem sambing? Ndigan ngo ia uè ndungo?

¹⁰Cirempu ngo ia ninganna ndong-ndong janah nina, “Ah, meddem mo aku sinempas, ai tertunduh ngo aku.”

¹¹Tapi sinderrang meddem i ia, sempa mo kekurangen bak kinicor bana bagè pekiroh pendaus mersinjata.

¹²Kalak perjahat dekket sikurang ajar dak luap ngo barang mikè sambing.

¹³Main mata dekket kodè ngo ia lako menipu.

¹⁴Macik ngo ukurna janah dom akkal jahat dekket petubuhken perubaten barang i dikè sambing.

¹⁵Karina i gabè memaingken sintempu sempa cilaka mi dirina, nai ripur mo ia.

¹⁶Lot pitu bagè maing gogo atè JAHOWA janah oda terbellisa: Pengelako sombong, babah merluap, tangan memunuh siso mersalah, ukur menura-nurai jahat, nèhè simerkebbas mi kejahaten, saksi luap, dekket kalak siperohken persilisihen bai simerdengan.

²⁰Alè pa, ulaken mo kadè sinidokken bapamu, janah ulang ko lupa sipesèngèt inangmu.

²¹Dak èngèt mo rana kalak i janah radum-radumi ibas ukurmu.

²²Peddah kalak i meneggu-neggu ko i perdalanen, menjamoti ko tikan berngin janah memerèken sipesèngèt bamu tikan ndungo ko.

²³Dosken suluh nterrang ngo tennah partuamu i; sipesèngèt kalak i menuduhken bamu bakunè cara nggelluh simerandal.

²⁴Merkitè bagidi ipedaoh ngo ko bai daberru sibabijalang nai dekket ipas ajar latlat merbisa sinibages sidèban i nai.

²⁵Ulang ko melarat midah kinimberruna, ulang lekket ukurmu mengidah matana mengido.

²⁶Daberru sibabijalang ndorok iongkos nasa harga pangaen sada dulang, tapi melangkah julu meddem dekket sinibages sidèban, kessah ngo gararna.

²⁷Isè ndorok menempi api oda pella messeng bajuna?

²⁸Isè ndorok mendedoh rara oda messeng nèhèna?

²⁹Dos ngo marana i dekket mercampur taba sinibages sidèban. Barang mengulaken bagi, oda maluah i hukumen nai.

³⁰Mula itangko dèba pangaen, mula pè kumarna lèhè, merlèa mo ia.

³¹Nai mula terbettoh, kennah gararenna ngo pitu kali lempit, lako misidi sambing kennah mago mo karina hartana.

³²Tapi bakunè ngo ukum daholi perlangkah julu meddem? Dirina sendiri ngo icèdai! Moto kalohon ngo ia!

³³Isiksa mo ia janah icèdurken dèba. Ngkemmer mo gerarna soh mi amman sumendah.

³⁴Kerna kemulihken pengelakona bagidi gabè cimburu mo sinibalè daberru i, gabè oda alang-alang lagana. Janah bales dendam kessa mo ia, oda lot nè bana masèh atè.

³⁵Oda terèlèk ia dekket kèpèng; sadikè dangdangmu oda mènak lagana.