Read Batak Dairi Peddah 7 Bible Online

Peddah 7 - Batak Dairi bible

Peddah 7

¹Dak èngèt mo katangku i alè pa janah ulang lupaken kadè sikuajarken bamu.

²Uèi mo karina peddah pengajarenku asa sennang nggelluhmu. Ekutken mo peddahku mendè-mendè bagè bakunè ko menjaga anak matamu.

³Dak èngèt mo karina sikupeddahken i, janah radum-radumi ibagasen pusuh peratèenmu.

⁴Etong mo kepantasen i bagè dengan sibeltekmu dekket perbinettohen i bagè alè-alèmu.

⁵Kepantasen ngo maing ndaoh ko bai daberru sibabijalang nai, bang bai daberru simengajar-ngajari ko merkitè kata-kata manis.

⁶Tikan sidari, menatap-natap ngo aku i jendèla bagesku nai.

⁷Nai kuidah mo mèduk terajar anak perana; tapi kuperdatèken mo lot sada kalak moto i tengah-tengah kalak i.

⁸Tikan ciboen enggo kessa ramben ari, merdalan-dalan mo anak perana i i gembar èluk i dalan lako mi bekkas sada kalak daberru merian.

¹⁰Ukum daberru i sada kalak siso sennang ndong i bagesna ngo. Sigejap-sigejap enggo i biding dalan i ia, nai laus mi kasèan, sipata cènder mèma-mèma i sirpang dalan. Galgalen ngo ia, oda ibettoh haip. Kuidah mo ia karuar merpakèen sibabijalang, isimbaki mo anak perana i merdengan taki bècuk.

¹³Ikerpi mo anak perana i janah isanggohi. Oda mèla-mèla idokken mo ranana,

¹⁴“Sidari èn kennah kugarar ngo bagah-bagahku, janah enggo mo kupèlèken pèlèenku kemulihkenna i.

¹⁵Kumernaken i ngo asa roh aku menulusi ko, asa mangan i bagesku ko. Bagèndari enggo jupaku ko!

¹⁶Enggo kuamaki pedemmenku dekket belagen merbunga-bunga i Mesir nai,

¹⁷janah enggo kupispisi dekket minak mur baungkus, bak minak kayu cendana dekket kayu manis.

¹⁸Bagèndari pè ita mo kumiali ninganna kirasai sintaboh suntuk berngin èn.

¹⁹Oda ngo i bages serangenku, ai i perdalanen ndaoh ngo ia bagèndari.

²⁰Iembah ngo mbuè riar, janah oda mulak ibagasen dua minggu.”

²¹Bagi mo ibaing daberru i mengajar-ngajari anak perana i merkitè rana manis-manis, nai tergoda mo ia.

²²Oda pella merpikir, mèter ièkutken mo daberru i, tosè bagè kerbo siniiring mi penèaten dekket bagè jelma sinitangkup iteggu lako menjalo hukumen sienggo ipèmaken bai jelma moto;

²³sinempas nai itustus anak panah mo atèna. Tosè bagè manuk-manuk ngkabang mi jorat, bagi ngo anak perana i oda satdar kessahna terancam.

²⁴Kumarnana i alè pa, dengkohken aku. Peratè-atèken mo peddah pengajarenku.

²⁵Ulang paduè daberru sibagidi mengèkèti ukurmu; ulang tulusi ia,

²⁶ai enggo mèduk isalpuni nggelluh daholi. Oda nè terbilang buèna binasa kumarna ia.

²⁷Laus mi rumahna merlapaten dalan pemotongen mi kematèen.