Read Batak Dairi Peddah 8 Bible Online

Peddah 8 - Batak Dairi bible

Peddah 8

¹Dengkohken mo! Kepantasen i dilo-dilo, kepistaren mendiungken.

²Cènder ngo ia i uruk-uruk i biding dalan, dekket i sirpang-sirpang.

³I pèntu pengkeruhen, i dalan mbengket mi kuta, i sidi ngo terdengkoh sorana.

⁴“Alè jelma permanusia bamu ngo dilo-dilongku; gennep jelma sini tanoh èn, perdatèken mo pendokenku!

⁵Kènè simadèng nggeddang radumen, merguru mo asa ntajem merpikiren; kènè simoto merguru mo asa satdar.

⁶Radumi mo ranangku, kerna karina i bennar janah tuhu.

⁷Sikuranaken tuhu ngo karina, kumerna nggogo atèngku midah luap.

⁸Katangku ntèger ngo karina, singkebabah poda meralit barang salah.

⁹Bai kalak sipandè, tuhu ngo ranangku, bai kalak bijak, bennar ngo ranangku.

¹⁰Hargaken mo peddahku lebbih daripada pirak sinitingtingi, perluken mo perbinettohen lebbih daripada emmas tulèn.

¹¹Aku ngo kebijaken i mahargaen daripada berlian; oda terpedos i mi barang kadè sambing pè gerrek atèmu.

¹²Aku ngo kebijaken bangku ngo lot pengarusien, kepantasen dekket perbinettohen.

¹³Sipesangapken JAHOWA merlapaten moyang atèna midah kejahaten; oda lemmo atèngku midah kesombongen bak kejukkaten. Nceggo ngo atèngku midah pengelako jahat, dekket kata-kata mengakkali.

¹⁴Aku ngo merrèken ilham. Aku ngo pesautkensa. Cerdas ngo aku janah mergegoh ma.

¹⁵Kuurupi ngo raja-raja pedalanken pemerèntahen, perkuasa pè kutolong ngo pecèndekken keadilen.

¹⁶Kumarnaken jasangku, kalak mbelgah bak kalak raja memerèntah dekket pedalanken keadilen.

¹⁷Ngkelleng ngo atèngku midah simengkekelengi aku; barang isè menulusi aku jupasa ngo aku.

¹⁸Hantar ngo bangku kinibèak bang kesangapen bak kiniduma.

¹⁹Sidapet ko bangku nai lebbih daripada emmas sinitingtingi, mahargaen dèng daripada pirak asli.

²⁰Kuèkut-èkut ngo dalan keadilen, merdalan ngo aku i dalan kebujuren.

²¹Kalak simerkelleng atè baku, kubaing mo ia kaya; kudomi bagesna dekket harta maharga.

²²Aku ngo ihanaken JAHOWA i mula-mulana, aku ngo sinitempana i tikki arnia.

²³Aku ngo itempa kessa nai permulaen jaman, i mulana nai, tikan tanoh èn madèng ihanaken.

²⁴Tubuh aku sinderrang madèng ihanaken laut raya, sinderrang madèng lot laè mata-mata.

²⁵Tubuh aku sinderrang madèng ipajekken delleng-delleng i, sinderrang madèng ipajekken uruk-uruk i,

²⁶sinderrang madèng ihanaken JAHOWA tanoh èn dekket adarenna, imo tikan madèng ihanaken giam singkupul tanoh perlebbè.

²⁷Kuidah ngo tikan iamakken langit i, dekket kajang-kajang i ipekimbang i laut i,

²⁸tikan madèng ibaing JAHOWA hembun i babo i, dekket memuka benna laut i,

²⁹tikan iperèntahken mi laè laut, asa ulang ilausi perbalengenna. I sidi ngo aku tikanna i tikala ibaing alas dunia.

³⁰I gembarNa ngo aku bagè anak lemmo-lemmona, gennep ari aku ngo kesennangenNa; dakdak ngo aku kumiali i lebbèna.

³¹Mersennang-sennang ngo aku i babo tanohNa, janah mersampang atè i tengah-tengah jelma.

³²Kumarna i dengkohken kènè aku alè simatah daging! Uèi kènè peddahku, asa kènè terolih sennang.

³³Jalo mo peddah pengajaren asa gabè bijak kènè, ulang lèas ukurmu midahsa.

³⁴Sayurntua ngo kalak simendengkohken aku, gennep ari dak kundul mèma i pèntu bagesku, janah merjaga-jaga i pengkeruhen bekkasku.

³⁵Barang isè menjumpai aku, terolih kenggeluhen, bana ngo JAHOWA merkelleng atè.

³⁶Barang isè siso menjumpai aku, rogi mo dirina sendiri; kalak simerceggo atè bangku, kematèen ngo ikekelengi!”