Read Batak Dairi Peddah 9 Bible Online

Peddah 9 - Batak Dairi bible

Peddah 9

¹Enggo ipajek kepantasen i bages, janah enggo ipecènder tihangna sipitu i.

²Enggo mo isembellih pinakan pangaen pèsta, enggo mo iilang laè anggur hidangenken.

³Perkebbas daberru enggo ipasulak dilo-dilo mi bekkas sindatesna i kuta.

⁴“Barang isè siso merpengalamen, roh mo ia mi sèn!” Taba kalak siso merukur nina kepantasen i ngo,

⁵“Roh mo kènè mengakapi pangaenku dekket mengènum anggur sienggo kuilang.

⁶Tadingken kemotoen i, asa sennang nggelluhmu. Ekutken mo dalan jelma bijak.”

⁷Mula ituduhken ko kesalahen kalak siso uè iajari, gabè tertaba ngo ia midah ko. Mula ilagai ko kalak perjahat, ilèai ngo ko.

⁸Ulang pincang kalak siso uè iajari, asa ulang nggogo atèna midah ko. Tapi ukum kalak simpantas ituduhken ko salahna, ihormati ngo ko.

⁹Mula ipesèngèt ko kalak simpantas, makin mpantasna mo ia. Janah mula iajari ko simerkebiaren taba Dèbata, makin tambah mo perbinettohenna.

¹⁰Barang isè naing bijak, perlebbè kennah uè ia pesangapken dekket merkebiaren taba Dèbata. Mula itandai ko simbadia kalohon i, terolih pengarusen mo ko.

¹¹Kebijaken ngo merèken bamu umur nggeddang.

¹²Mula lot bamu kepantasen, kono ngo merlaba olih. Tapi mula itulak ko ngo ia, kono ngo rogi.

¹³Tosè ngo kemotoen i bagè daberru ngalngalen siso ibettoh hana-hununa dekket oda ibettoh haib.

¹⁴Bekkas sibagidi imo i babah pèntu bagesna barang i pèntu pengkeruhen kuta.

¹⁵I sidi nai tenggo-tenggo ngo ia taba jelma mentas. Iajar-ajari ngo kalak perborjok-borjok,

¹⁶“Singgah kènè alè simadèng merpengalamen!” Janah nina taba kalak sikurang ukur,

¹⁷“Tenggi ngo rasa laè tinangko, janah merasaen ngo mangan merboni-boni.”

¹⁸Kalak sienggo dapetsa iajar-ajari oda satdar, matè i sidi mo kalak simendahisa idi; janah kalak sienggo mbengket mi bagesna, enggo mo ibagasen napa kematèen.