Read Batak Dairi Perjamita 1 Bible Online

Perjamita 1 - Batak Dairi bible

Perjamita 1

¹Kata sinibagasen bukku èn bai Simbages Nahu nai ngo rohna, imo anak si Daud, simeningkat si Daud gabè raja i Jerusalem.

²Simbages Nahu i mendokken: Karina ngo magosia janah oda merguna! Sia-sia ngo nggelluh i oda lot artina.

³Mahan bahaen ngo kita sidekkah nggelluh, mengkerris panas. Tapi, apai mo hasilna sindorok sigegahken?

⁴Merlaus roh ngo cundut jelma i, tapi ukum dunia èn hot ngo bagi sambing.

⁵Tong ngo mbincar mataniari janah tong ma ngo sundut. Ibagasen ledja molih ngo ia mi bekkasna kin nai mbincar nola me- ngolihi.

⁶Menempul ngo angin mi selatan, nai mengembus mi utara; merputar mo ia, nai balik nola mengolihi.

⁷Karina laè menjarir mi laut, tapi oda merkedomen laut i. Laèna balik mi takal laè, nai menjarir nola mengolihi.

⁸Mengalah karinana janah oda tersukutken bakunè simengalah i. Oda nung polih matanta menengen; copingta pè oda nung bessur mendengkoh.

⁹Kadè sienggo nung masa, kennah masa nola mengolihi. Kadè sienggo pennah iulaken, iulaken nola mengolihi. Oda lot barang kadè sirembaru i dunia èn.

¹⁰Lot ngo kalak mendokken, ‘Tengen mo rembaru ngo èn!’ Tapi enggo kin ngo lot i sinderrang madèng tubuh kita.

¹¹Oda ièngèt jelma simasa sienggo laus i. Bagi ma ngo simasa bagèndari dekket sinipodina, oda ièngèt jelma siperpodi.

¹²Aku Simpantasniasè memerèntah i Jerusalem mengerajai kalak Israel.

¹³Kutekatken ngo lako meniahi dekket mengerisiki merkitè kepantasen karinana simasa i dunia èn. Tuhu-tuhu peluiken atè ngo bagian sinipèmaken Dèbata banta.

¹⁴Enggo kuidah karinana pemahan jelma i dunia èn. Percaya mo, magosia ngo i karina, tosè bagè me- ngayaki angin.

¹⁵Simbèkkuk oda terpepènter janah silot oda terbilangen.

¹⁶Dok atèngku, “Ukum aku enggo gabè kalak mahantu dekket pantas, ndaoh pantasen daripada karina jelma simemerèntah i Jerusalem tikan madèng aku. Lahlah ngo kupepulung kepistaren dekket perbinet- tohen.”

¹⁷Nai kutekatken mo lako memettoh perbèdaen perbinettohen dekket kemotoen, kalihna kebijaken dekket kelengahen. Keppè terdapet mo aku èn bagè mengayaki angin sambing.

¹⁸Ai mula makin pandè kita, makin mbuè ngo kebiarenta. Makin mbages perbinettohen, makin mbuè ngo kesusahenta.