Read Batak Dairi Perjamita 11 Bible Online

Perjamita 11 - Batak Dairi bible

Perjamita 11

¹Pedalan mo riarmu mi ruar nagerri. Pasti dapet kono laba i podi ari.

²Suan pokokmu i mermatcam bagè tiga-tiga; tulusi mo usaha mbuè bagèna. Kumarna kennah merjaga-jaga ngo jelma sinderrang madèng sempa mara.

³Barang mikè mbulak kayu dak ngo gampar i bekkasna ndabuh. Mula ngkapal hembun merbalun-balun roh mo udan mi tanoh èn ndor kalohon.

⁴Barang isè memèma lebbè mendè angin dekket ari oda mo ia mardang janah oda ma mo merani.

⁵JAHOWA ngo menghanaken karinana silot janah oda terantusen jelma pemaingna; bagi ma masa nggelluh sirimbaru oda iarti ibagasen kandongen sada pertua ibages.

⁶Ardangken bennihmu tikan ceggen ari janah ulang mengadi mula pè gellap ari. Kerna oda sibettoh sinisuanken pai mendè perturahna. Nggèut ma ngo merandal i duana.

⁷Cuhaya mataniari maing sampang atè sondel mo seddapna mula terbaing mengakapken i.

⁸Dokken mo menjalo metangkup mula tambah umurmu. Tapi èngèt, mula pè ndekkah ko nggelluh i tanoh èn, dekkahen dèng ngo ko i bekkas kematèen. Nai, kadè mo siniharapken dèng ma? Karinana i magosia.

⁹Rasaken mo kenaposoenmu alè anak perana! Mersampang atè mo ko sidekkah menguda. Ulaken mo karina sèkel atèmu bahanken mo karina niat ukurmu. Tapi èngèt, Dèbata sinisorga luas menghukumi ulah-ulahmu karina.

¹⁰Pedaoh mo rembekbekken dekket susah i ukurmu nai kerna ndor ngo laus kenaposoenmu i.