Read Batak Dairi Perjamita 12 Bible Online

Perjamita 12 - Batak Dairi bible

Perjamita 12

¹Èngèt mo situmempa ko tikanmu anak perana tikan madèng roh tahun dom kinipersah. Tupung masana i dokenenmu mo ranamu “Oda merkesennangen nggelluhku.”

²Dapet kessa tikkina i penengenmu maknè nterrang, gabè mehèjem mo mataniari, bulan bak bintang. Hembun merbalun nggondem merembah udan dak roh bamu bagè pengasupen.

³Betekkenmu menggirgir maknè ndorok menampar. Nèhèmu mergegoh i kin gabè ndotè, menggirgir. Epenmu maknè cukup lako mengatngat pangaen. Matamu ramben gabè maing mehèjem penengen.

⁴Simeriah i dalan alang-alang terdengkoh mi pènggelmu. Sora gotci dekket penggilingen bagè maknè terdengkoh. Lènek meddem pè oda nè terbaing ko. Sora manuk-manuk pè maing ko ndungo.

⁵Mbiar mo ko menangkengi bekkas ndates. Merdalan pè kennah mo hanjar-hanjar. Bukmu ubanen bak nèhèmu iruah ko nai ngo mula merdalan. Gabè maknè lot barang kadè sèkel dekket angan-angan. Berkat mo kita mi bekkas pentadien perpodi marsak ngo jelma janah tangis tikan menaruhken.

⁶Rantè pirak nggettas bak mersirang lampu emmas ndabuh nai mpetcah; èkèt cimba mpostep dekket mpustak; goci sarsar janah mersèrak-sèrak.

⁷Mulak mo dagingta gabè abu i tanoh èn. Kessah kenggeluhenta balik bai Dèbata. Ia kin ngo memerèken i sikira basa-basa.

⁸Ningku, tuhu ngo siasia i karina, karina oda merguna oda lot artina.

⁹Simbages Nahu i sondel mo bijakna. Kumerna iajarken ngo bai ummat karina pemettohna. Mbuè ngo peddah iguruken ia nai ioji mo kebenarenna.

¹⁰Iusahaken ngo asa dapetsa kata apo-apo dekket kata sinisuratkenna pè tuhu ngo.

¹¹Kata-kata kalak simpantas i tosè bagè tongket ntajem kalak permakan tongket sinipakkèna mengurupi pinakan. Pulungen ajar dekket peddah bagè labang ilabangken mbages ntegguh. Karina i JAHOWA ngo merèken banta ai pellinsa ngo mermakan kita.

¹²Alè pa, lot ngo sada, asa ibettoh ko merjaga-jaga. Menurat ibas bukku oda lot puncana, janah mbuèsu pè merguru maing ledja daging bak ukurta.

¹³Enggo kessa karinana kupikir-pikiri èn mo rèmpun dapet aku. Merkebiaren mo taba JAHOWA janah uèi karina perèntahna kerna kemulihken i ngo asa itempa jelma.

¹⁴JAHOWA ngo menghukum pengelakonta karina pengelako merandal dekket siso kasèa dekket simboni i karina.