Read Batak Dairi Perjamita 2 Bible Online

Perjamita 2 - Batak Dairi bible

Perjamita 2

¹Kupekkibul mo ukurku pellin lako pesennangken diringku sambing asa kubettoh kadè ngo kesennangen i. Keppèken sia-sia ma ngo bang i.

²Gabè satdar mo aku, ukum taba i keppèken kemotoen ngo janah kesennangen i oda lot gunana.

³Terenjar ibas ukurku asa gabè mpantas, kuhatken mo mersennang-sennang aku merkitè mènum anggur dekket merpèsta-pèsta. Kudok ngo i cara simendèna bai jelma i lako mengerasaken nggelluhna sijoppok i tanoh èn.

⁴Mèduk ngo ulaen mbellen kuulaken. Kupajek ngo bages-bagesku. Kubaing mo kasèan-kasèan bak pekken-pekken sikusuani dekket anggur bak sagumanna matcam bagè kayu merbuah.

⁶Kupebangkit ngo laè mi kasèan bak pekken-pekken i.

⁷Nterrem ngo hambangku, sikutokor dekket situbuh i bagesku. Ndaoh buèen pinakanku daripada pinakan barang isè pè sinung merian i Jerusalem.

⁸Kupepulung ngo pirak dekket emmas persembahen raja-raja i nagerri jajahenku nai. Perendè daholi bak daberru pesennangken ukurku merkitè endè-endè kalak i. Lot ngo siterbuangku sadikè buè sikuperluken.

⁹Situhuna aku dèng ngo simbelgahna daripada karina sipernah merian i Jerusalem janah aku dèng ngo simpantasna.

¹⁰Kupepolih ngo karina sinipergeddo ukurku. Oda nung kuantak mengerasai kesennangen kadè pè i. Gegah ngo aku kumarna karina hasil kelejaenku, janah idi mo upahku.

¹¹Nai kupemanat nola mo karina sikuulaken i, bagi ma dekket karina kelejaenku lako pepulken sikubahan i, satdar mo aku karina i oda keppè lot kadè artina. Sia-sia sambing ngo sikubahanken i tosè bagè mengayaki angin.

¹²Barang bakunè nola pè keppè, sada kalak raja, pellin mengulaken kadè sienggo iulaken raja sinilebbèenkenna ngo. Nai mulai mo aku merpikir-pikir: Kadè mo gunana gabè mpantas barang moto barang lengah?

¹³Nemmuken kubettoh ngo, “Lotien dèng ma ngo kepantasen daripada kemotoen i, tosè bagè lotien dèng sinterrang daripada singgellap i.

¹⁴Kalak pandè ibettoh ngo mikè sinihujuna; kalak moto bagè merdalan dadap-dadap ngo ia.” Tapi kubettoh ngo bagi ma ngo nasip sempa bai kalak i karina.

¹⁵Nai kata pikirenku ibagasen, ‘Bakunè sempa bai jelma moto bagi ma ngo sempa bangku. Jadi kadè mo gunana kepantasenku i karina?’ Nai, kurèmpun mo, kadè poda keppè tuhu guna kepantasen i.

¹⁶Ndor ngo ilupaken jelma moto i, tapi kalak simpantasniasè pè oda ma ngo ièngèt. Makin ndekkah mersep mo kita karina ipas pernèngèten nai. Kennah matè ngo kita karina, barang jelma mpantas barang pè jelma moto.

¹⁷Kumarna i oda lot nè lapaten nggelluh i bangku. Karina i sia-sia; pellin mengayaki angin sambing ngo kessa aku.

¹⁸Karinana sikuulaken dekket sikucari oda lot kadè gunana bangku, kumarna kennah kutadingken ngo i bai penggancihku.

¹⁹Janah isè mo bettoh-bettohen tah mpantas ia barang moto? Tapi barang bakunè pè i kennah ngo ia gabè sidasa hasil sikubahan sienggo dapet aku sidekkah nggelluhku i dunia èn merkitè kelejaen dekket kepandèenku. Nai idi pè siasia ngo.

²⁰Peselsel ngo aku bagèndari kerna kuempet mahan bahaen.

²¹Kumerna kennah mertuhu-tuhu ngo jelma i mahan bahaen merdengan karina kepandèen, perbinettohen dekket kepistarenna asa dapet sinipergeddo. Tapi ujungna kennah itadingken ngo karina hasil kelejaenna bai jelma siso nung panasen tersèngèt i. Jadi idi ma pè siasia ngo, janah dèng ma tuhu-tuhu oda adil!

²²Sidekkah nggelluh ngo jelma i mebrrat mengula janah mersusah-susah; nai kadè mo hasil kelejaenna sindorok igegahken?

²³Barang kadè ibahanken sidekkah nggelluhna, merembahken kinidersa dekket ncio ukur bana. Tikan berngin pè merkalimesso ngo ukurna. Nai karina i siasia sambing.

²⁴Oda lot nè termendèen bai jelma i daripada mangan, mènum dekket mengakapken kinintaboh hasil ndiulana. Kubettoh ngo bang idi pè sibasa-basa Dèbata ngo.

²⁵Isè terbaingsa mangan dekket mersennang-sennang mula oda bai Dèbata nai rohna?

²⁶Dèbata ngo memerèken kepantasen, perbinettohen dekket kesennangen taba jelma sipesennangken atèNa. Tapi ukum jelma perdosa ibaing ngo mencamet menulusi pangaen dekket pepulungken hasilna asa iberèken bai kalak sipesennangken atè Dèbata. Jadi karinana i siasia ngo bagè usaha menga- yaki angin.