Read Batak Dairi Perjamita 3 Bible Online

Perjamita 3 - Batak Dairi bible

Perjamita 3

¹Sagumanna silot i dunia èn hana tupung katika sinitentuken Dèbata.

²Dèbata ngo menentuken ketika menubuhken dekket ketika matè, ketika menuan dekket ketika memerkat,

³ketika lako memunuh dekket ketika lako pemalumken, ketika lako mengerumpakken dekket ketika lako memajek.

⁴Dèbata ngo menentuken ketika lako tangis dekket ketika lako tertaba, ketika tangis milangi dekket ketika tumatak,

⁵ketika lako campur dekket ketika pantang mercampur, ketika pekerpi dekket ketika mengorom diri.

⁶Dèbata ngo menentuken ketika dapet-dapetten dekket ketika kembalangen ketika memennep dekket ketika pelausken,

⁷ketika lako mengeribak dekket ketika menjarum, ketika lako sip dekket ketika mengerana.

⁸Dèbata ngo menentuken ketika mengkekelengi dekket ketika nggogo, ketika lako mergeraha dekket ketika lako merdamè.

⁹Kadè mo hasil karina kelejaenta?

¹⁰Kubettoh ngo iberèken Dèbata ngo boban mbotong banta.

¹¹Itentuken ngo tupung ketikana mi karinana silot. Iberèken ngo banta ukur sèkel lako memettoh ari podi, tapi oda terantusen kita pemaing Dèbata i bennana nai soh mi puncana.

¹²Kubettoh ukum simendè banta imo mersampang atè dekket mengakapken kinintaboh nggelluh sidekkah umurta.

¹³Sisellohna karina kita mangan bak mènum ningan mengakapken kinintaboh hasil ndiulanta. Ai basa-basa Dèbata ngo i.

¹⁴Kubettoh ngo karina sinibaing Dèbata hot ngo i soh mi amman sumendah. Ukum jelma oda terbaingsa menambahi barang mengkurangisa. Ibaing Dèbata bagidi, asa merkebiaren ngo kita midahsa.

¹⁵Simasa bagèndari sienggo nung masa kin ngo i. Sinaing lot i pè, enggo kin ngo ndekkah lot. Dèbata ngo menentuken asa karina sienggo masa, masa nola mengolihi.

¹⁶Lot dèng ma ngo kuidah i dunia èn: I bekkas patutna nemmuken lot ketègerren dekket kiniselloh, i sidi nola ngo lot kejahaten.

¹⁷Dok atèngku ihukum Dèbata ngo jelma simerpengelako selloh bak jelma jahat, kumarna karina simasa bak karina pengelako, masa ngo i tupung ketika sinitentuken Dèbata.

¹⁸Rèmpunna kubaing imo: Ioji Dèbata ngo kita lako pecidahken ukum nasipta oda kalih bagè nasip natèk-natèk.

¹⁹Barang bakunè pè i nasip jelma dekket natèk-natèk dos ngo. Matè ngo sisada èn bagi ma ngo sidèbankenna i. Duana ngo i sinihanaken. Asa oda ngo kadè kalihna jelma ipas binatang nai, ai siasia ngo nggelluh i bai kalak i kacimbangna.

²⁰Bekkas situjuen kalak i pè dos ngo. Asalna imo ipas abu nai janah kennah balik kembali abu.

²¹Oda sibettoh, tah laus mi babo tendi jelma janah tendi binatang susur mi terruh tanoh.

²²Kumarna i enggo tangkas kubettoh, ukum simendèna bai jelma imo mengakapken kinintaboh hasil ndiulana. Laènkenna i oda lot nè sindorok ibahanken. Oda lot ibettoh nèngè barang kadè sinaing masa enggo kessa matè ia.