Read Batak Dairi Perjamita 4 Bible Online

Perjamita 4 - Batak Dairi bible

Perjamita 4

¹Nai kuperdatèken nola mo karina siso adil i dunia èn. Tangis ngo kalak sinitèndes i janah oda lot siuè mengurupi kalak i. Sada kalak poda uè mengurupi, kumarna mbelgah ngo kuasa penèndes i.

²Cian ngo atèngku mengidah jelma sienggo ndekkah matè i kumarna sennangen ngo kalak i daripada jelma singgelluhna dèng.

³Tapi simertuahna dèng imo jelma simadèng tubuh, kumarna oda idah kalak i dèng kajahaten simasa i dunia èn.

⁴Kubettoh ma ngo ukum jelma i rengngè ngo mahan bahaen, pellin kumarna ncian mengidah hasil ndiula gembar bagesna. Karinana i siasia sambing tosè bagè mengayaki angin.

⁵Pellin kalak simoto ngo kessa kundul memurun cèputna janah ibelli dirina matè rapar.

⁶Tah bakunè tuhu i, tapi lotien ngo cituk harta merdengan ukur tennang daripada rengngè mengula menggunaken tangan i duana keppè mengayaki angin.

⁷Lot dèng ngo siasia ipas nggelluh èn.

⁸Lot ngo jelma i pellin sadasa muil-uil nggelluh oda lot dukakna, barang kaka-anggina. Tukasi pè bagi, tong ma ngo mertuhu-tuhu ia mahan bahaen janah oda nung puas iakap i hartana i. Lako bai isè ngo sinikerisken panasna i janah itulak sagumanna kesennangen? Idi pè siasia ngo, janah sada cara pernggelluh mpersah.

⁹Lotien ngo dua kalak daripada sada kalak punjung. Mula mahan bahaen kalak i, makin mendè ngo hasilna.

¹⁰Mula geppah sisada, sisada nai ndorok mengurupisa. Tapi mula geppah sada kalak, keppèken sadasa kessa, cilaka mo ia, kumarna oda lot sindorok mengurupisa.

¹¹Tikan berngin mbergoh, mula lot dua kalak rebbak meddem ndorok mo mersikesingen bana gabè mpeddas, tapi bakunè mo permpeddasna mula pellin sada kalak?

¹²Dua kalak laus merdalani ndorok menangkis penjuhap, tapi mula sada kalak ngo murah ngo italuken dèba. Tali tellu tinali mahal ngo i gettapen.

¹³Kalak ncor ndorok ngo gabè raja janah sada kalak sikurungen ndorok pindah mi babo tahta. Tapi mula enggo nggeddang umur motosu nola ngo raja i lako menjalo pemernoi. Jadi merohaen ngo nasipna daripada anak perana ncor tapi ncerdas.

¹⁵Kupikirken kessa tersèngèt karina jelma sinidunia èn, satdar mo aku, pasti lot bai kalak i nai sada kalak anak perana sumingkat raja.

¹⁶Ginemgem siniulukenna pè nggèut ngo oda terbilangen buèna, tapi enggo kessa laus ia, oda lot mendokken lias atè mernèngèt jasana. Tuhu ngo karinana siasia bagè cara mengayaki angin.

¹⁷Mermanat mo ko mula naing laus mi Bages JAHOWA. Lotien ngo kono laus mi sidi lako merguru daripada lako memèlèken pèlèen, bagè pemaing jelma moto. Ai oda terbèdaken kalak i siapai ngo selloh janah siapai salah.