Read Batak Dairi Perjamita 5 Bible Online

Perjamita 5 - Batak Dairi bible

Perjamita 5

¹Pikirken lebbè sinderrang madèng mengerana, janah ulang ndorsu merjandi taba Dèbata. I sorga ngo ia merian janah i tanoh en ngo kono, jadi kencit mo kata-katamu.

²Makin roga, makin ndèmut ngo nipi camber. Makin mbuè rana, makin mbuè ngo karuar kata-kata leppik.

³Jadi mula lot niat bak jandimu bai Dèbata, ndor mo teppati. Oda lemmo atèna midah jelma simerpengelako moto. Kumarna i teppati mo jandimu.

⁴Lotien ulang maing jandi daripada merjandi keppè oda ipahèi.

⁵Ulang mo ko merdosa kumarna kata-katamu, gabè terpaksa idokken ko taba imam simengkebasi JAHOWA, magahken silap ko mengeruapken jandimu. Kadè gunana maing melaga Dèbata bamu gabè icèdai hasil ndiulamu?

⁶Bagè buè nipi siso lot artina, bagi ma ngo mbuè rana oda lot gunana. Tapi merkebiaren mo taba JAHOWA.

⁷Ulang lengang mula mengidah itèndes perkuasa jelma ncor, mengerampasi hak kalak i janah oda adil ibaing taba kalak i. Gennep pugabè ilègenni èkutenna janah kalak i sidua ilegenni perpangkat sindatessen pangkatna dèng.

⁸Nggelluh raja pè mergantung mi hasil peranien nai ngo.

⁹Barang isè mbara matana midah riar, oda nung cukup riarna; jelma gila-gila harta oda nung puas merlaba. Karina i siasia.

¹⁰Makin bèak jelma makin mèduk jelma kennah berènna mangan. Oda lot laba bai sidasa, pellin èn ngo ibettoh, bèak ia.

¹¹Sada kalak pengula nggèut ngo oda cukup pangaenna, tapi simadana mo ia ndorok lènek meddem. Balikna nola sada kalak sibèak mbuè kalohon hartana, gabè oda ndorok terpeddem ia kumarna rembekbekken.

¹²Lot ngo kuidah i dunia èn maing melui atè: Sada kalak pepulungken harta mertènjun mahan keperluen tikan masa keposekken.

¹³Tapi mbalang mo harta i tikan masa kemalangen, gabè oda lot tadingenkenna bai dukak-dukakna.

¹⁴Lubus ngo kita tubuh, bagi ma ngo sitadingken dunia èn, oda lot siembah barang kadè pè ipas sinikelejakenta idi nai.

¹⁵Tuhu-tuhu maing melui ukur ngo i! Laus kita tosè bagè tikala roh i kita. Sondel mo kelejaenta bagè mengayaki angin, nai kadè mo hasilna?

¹⁶Sidekkah nggelluh dak dadap-dadap ngo kita ibas sigellap, rengè siakap, terendep-endep, sekkil dekket ncio atè.

¹⁷Nai tahu mo aku ukum simerandalna banta imo mangan, mènum dekket mengerasaken kinintaboh hasil ndiulanta sidekkah nggelluh joppok siniberèken Dèbata banta; imo nasipta.

¹⁸Mula ijalo sada kalak kinibèak dekket harta bai Dèbata nai, janah ipaduè ia mengerasaken kinibèak i, kennah mendokken lias atè ngo ia ninganna mengerasai kinintaboh hasil ndiulana i. Idi pè basa-basa Dèbata ngo i.

¹⁹Idomi Dèbata ngo ukurna merkitè sampang atè, nai oda pella gentar ia memikirken nggelluhna sijoppok i.