Read Batak Dairi Perjamita 6 Bible Online

Perjamita 6 - Batak Dairi bible

Perjamita 6

¹Kuidah dèng ma ngo siso adil mendendenni jelma sinidunia èn.

²Sipata iberrè Dèbata ngo kinibèak, kesangapen dekket harta bai sada jelma, sanga oda lot barang kadè nè sèkel ukurna. Tapi oda ipadiat Dèbata ia mengakapken kinintaboh karina sibasa-basa i. Balikna, siso itandai nola ngo mengerasaken kinintaboh kinibèak i. Jadi sia-sia ngo karina i dekket maing melui atè.

³Mula pè sada kalak lot seratus dukakna janah ndekkah nggelluh sanga soh tua-tua rokih-rokihen, tapi mula oda ngo iakap sennang janah oda ma selloh ikuburken, nai ukum dok atèngku, sellohen dèng ngo nasip anak mbaru tubuh lustun matè daripada jelma sibagidi.

⁴Ai oda soal bai anak mbara i tah itubuhken ia barang oda; laus ia mi sigellap, nai ndor ngo ilupaken.

⁵Madèng pennah ia mengidah cuhaya mataniari, janah oda iantusi dèng bakunè i kenggeluhen èn, gabè terbaingsa galè mènak.

⁶Jadi lotien ngo i daripada nggelluh jelma i dua ratus tahun, keppè oda nung iakapi sennang. Otang dos ngo bekkas dahien kalak i sidua?

⁷Mahan bahaen jelma i pellin lako mangan sambing ngo, tapi oda nung puas iakap.

⁸Jadi, kadè mo laba kalak simpantas ibandingken dekket kalak simoto? Kadè ma mo gunana mendè pengelako jelma ncor i tengah-tengah jelma nterrem?

⁹Sia-sia ngo karina i bagè kalak simengayaki angin. Lotien ngo puas siakap dekket kadè silot banta daripada dak sinengnengi termbuèen dèng.

¹⁰Karinana silot i enggo kin ngo lot i arnia nai. Sibettoh ngo ukum jelma i oda terdokkensa barang kadè taba kalak simergegohen bana nai.

¹¹Makin ndekkah ia mengaloi, makin oda nèngè merlapaten kata-katana, nola dèng ma oda lot kadè laba dapetsa.

¹²Bakunè mo pemettoh jelma i kadè simerandalna bana ipas nggelluhna sijoppok janah siso merguna èn, janah mersep bagè lèndung? Bakunè mo pemettoh jelma kadè naing masa i dunia èn enggo kessa oda lot nèngè ia?