Read Batak Dairi Perjamita 7 Bible Online

Perjamita 7 - Batak Dairi bible

Perjamita 7

¹Lotien ngo mendè gerar daripada minak maharga, janah lotien ngo ari permatè daripada ari pertubuh.

²Lotien ngo laus mi bages kalak bonek daripada mi bages perpèstaen. Kumarna i dak ngo kennah èngètenta mèma-mèma ngo kematèen bai karina jelma.

³Lotien ngo bonek daripada taba. Tukasi pè abè ncèrngut, asal mo ukur lumbang.

⁴Jelma moto dakdak mengayaki kesennangen; jelma mpantas dak memikirken kematèen.

⁵Lotien ngo ipincang jelma merukur diri, daripada ipoji jelma mahal mengantusi.

⁶Ukum taba jelma moto oda merarti tosè sora dori ipan api.

⁷Mula jelma mpantas mengkilang, moto ngo ulah-ulahna mula ijalo jelma kèpèng sisip ncèda mo pengelakona.

⁸Lotien ngo punca sada perkara daripada permulaenna; lotien ngo sobar daripada gegah.

⁹Ulang terudu melaga; pellin jelma moto ngo memennep dendamna.

¹⁰Ulang kusoken, ‘Kasa sellohen arnia daripada bagèndari?’ Pellin jelma moto ngo mengkusoken bagidi.

¹¹Jelma nggelluh kennah ngo merkepistaren; harga kepistaren dos dekket harga tading-tadingen;

¹²dos ma dekket kèpèng merrèken perasaen mènak. Lebbih bagi dèng ngo perbinettohen tersèngèt kebijaken! Barang isè lot bana i njuah-njuah mo ia.

¹³Peratè-atèken mo sinibahan Dèbata. Kerna isè ndorok pepènterken sienggo ibekkuk Dèbata?

¹⁴Jadi mersampang atè mo ko mula tupung langkah kamuhun. Tapi mula sempa bamu kinimago, ulang ko lupa ai Dèbata ngo memerèken i duana. Oda ngo sibettoh tah kadè nola masa udutna.

¹⁵Oda lot gunana nggelluhku, tapi sidekkah nggelluhku i kuidah ngo èn: Nggèut ngo sipata binasa jelma bujur i, tukasi pè ntèger ia. Lot ngo sipata nggeddang umur jelma perjahat i, tukasi pè dak terrus merdosa ia.

¹⁶Ulang sellohsu janah ulang ma bijaksu. Kadè gunana mendelles?

¹⁷Ulang ma jahatsu barang motosu. Man kadè matè kum madèng tikkina?

¹⁸Ilakken mo sidua i ndai. Mula merkebiaren kita midah Dèbata, pasti ngo kita merhasil selloh.

¹⁹Kepantasen maing lebih gegah jelma daripada sipuluh lubalang i sada kuta.

²⁰Oda lot jelma i tanoh èn sondel kiniselloh; oda lot pukpuk memaing mendè bak oda mersalah.

²¹Ulang kelemoken mendengkohken rana bual, oda nibettoh tah isumpahi sada kalak perkebbas ko.

²²Kono sendiri pè satdar ngo kalak sidèban nung isumpahi ko.

²³Karinana i kuoji merkitè kepantasenku. Keppè makin kutulusi kepantasen idi, makin ndaoh ngo ia bangku nai.

²⁴Isè ndorok dapet-dapetten lapaten nggelluh èn? Mbagessu ngo mahan arusen!

²⁵Tukasi pè aku merempet merguru bak menulusi kepistaren, asa terolih kepantasen dekket karina kuso-kuso nialoen. Kuoji ngo mengartiken, ukum dosa imo kemotoen janah kejahaten imo sininakkaten.

²⁶Nai dapet aku mo, mpagiten ngo daberru daripada kematèen. Dosken jala dekket togong-togong ngo ngkelleng atè daberru, kebbas menjerngem panganna. Pengkerpina bagè langgu memmes mengèkèti. Jelma simengulaken lemmo atè Dèbata, meluah ngo ibas jaratna nai, tapi jelma perdosa pasti ngo itaban.

²⁷Tengen mo nina Simbages Nahu: Karinana ngo jumpa aku i tikan gennep langkah kutulusi jababna.

²⁸Dak kutulusi dèng ma ngo jabab sidèban, tapi oda lot dapet. Ipas seribu kalak, jumpa aku ngo sada kalak daholi sikuhormati. Tapi i tengah-tengah kalak i oda lot daberru sindorok kupesangap.

²⁹Pellin èn mo kessa dapet aku; Dèbata ngo memaing kita oda lebbih janah biasa sambing. Tapi kita ngo memaing dirinta merkalimesso dekket merbulut-bulut.