Read Batak Dairi Perjamita 8 Bible Online

Perjamita 8 - Batak Dairi bible

Perjamita 8

¹Sondel mo sennangna iakap jelma bijak. Ibettoh ngo jabab mi karina simasa. Kepantasen memaingsa tercèrem meriaia gabè dak mo mbinar abèna.

²Iuèi mo mula maing perèntah raja, janah ulang baing padan siso tuhu bai Dèbata.

³Raja ndorok memaing guru dokna, mula oda tuju atèna, lotien mo pedaoh bamu.

⁴Raja memerèntah merkitè hejina; oda lot isè pang menonjasa.

⁵Jelma simenguèi tabasa, mènak oda lot menggulutisa jelma bijak ibettoh ngo ndigan janah bakunè menguèi raja.

⁶Mi karinana ngo lot tikki dekket carana sendiri, tapi pellin cituk kalohon ngo ukum siarusi.

⁷Sada kalak poda bettoh-bettohen nasip bakunè memèma, janah isè poda ndorok mendokken kadè naing masa.

⁸Sada kalak poda ndorok mengilakken barang menondat arina matè. Idi mo perjuhapen siso terilakken barang isè, oda ndorok ia maluah i sidi nari, agia merkitè akkal-akkal barang igajah-gajahi.

⁹Karinana èn kuidah tikan kuperdatèken karina simasa i dunia. Uè ngo lot jelma maing kuasana lako mencilakai denganna.

¹⁰Pennah ngo kuidah jelma perjahat matè dekket ikuburken. Tapi tikan balik jelma i mengkuburkensa nai, ipoji dèba ngo ia i kuta bekkasna mengulaken kejahaten i. Jadi ima pè sia-sia ngo.

¹¹Kasa bagi mudahna jelma i mengulaken kejahaten? Kumarna oda ndor idabuh hukum.

¹²Ai tukasi pè seratus kali kejahaten iulaken perdosa, tong ngo ia nggelluh janah nggeddang ngo umurna. Asa, barang isè menguèi Dèbata pasti melukah ngo nggelluhna.

¹³Balikna nola kalak perjahat ijumpai matcam bagè kesuliten. Ndor ngo mersep nggelluhna i bagè lèndung. Matè mo ia tikan cituk dèng umurna kumarna oda iuèi JAHOWAna.

¹⁴Tukasi bagidi, luap sambing ngo idi karinana. Tengen mo kadè simasa i dunia: Lot ngo jelma bujur ihukum bagè jelma durhaka, lot ma ngo perjahat gabè iberrè upah bagè jelma bujur. Jadi, idi pe sia-sia ngo.

¹⁵Nai kubaing mo rèmpunna, kennah mersampang atè ngo jelma. Kumarna i nggelluhna i dunia oda lot kesennangen bana laènken mangan, mènum dekket meriaia. Idi mo kessa ndorok iakapi ibagsaen kelejaenna sidekkah nggelluh siniberèken Dèbata bana.

¹⁶Tikan kutulusi asa dapet aku kepantasen janah kuperatè-atèken karinana simasa i dunia èn, satdar mo aku tukasi pè kita mersusah payah mahar ari berngin oda me- ngadi-ngadi,

¹⁷oda terantusen kita pemaing Dèbata. Barang bakunè nola pè sibaing, oda terantusen kita i. Kalak simpantasniasè mendokken ibettoh nina, tapi ukum situhuna oda ngo ibettoh.