Read Batak Dairi Perjamita 9 Bible Online

Perjamita 9 - Batak Dairi bible

Perjamita 9

¹Karina i seppè ngo kupikiri. Iatur Dèbata ngo nggelluh jelma bujur bak bijak, soh mi jelma simerceggo atè dekket si- merkelleng atè. Isè poda bettoh-bettohen kadè sinaing masa i podi ari.

²Tuhu, dos ngo pernasipen sisempa taba gennep jelma: Jelma bujur barang pè jelma luhlah, jelma selloh barang pè jelma jahat, jelma mpanting barang pè jelma melamun, jelma simemelèken pèlèen barang pè oda. Oda mendèen nasip jelma selloh daripada jelma perdosa, jelma simersumpah oda kalih bagè jelma siso uè mersumpah.

³Jadi dos ngo nasip sempa bai kalak i karina. Janah idi mo memaing melui atè tosè bagè simasa i dunia èn. Sidekkah nggelluhna dom kejahaten ngo ukur jelma, janah pikirenna pè dom kemotoen. Nai sintempu mo dapet ajalna.

⁴Tapi sidekkah mulak-ulak dèng kessah èn sidekkah i ma mo lot harapen. Otang sennangen dèng ngo biang nggelluh daripada singa oda merkessah?

⁵Simadana mo jelma singgelluh memettoh dak mèma ngo ajalna tapi ukum jelma sienggo matè oda nè tahu ia. Oda nè lot upah barang jambarna janah enggo ilupaken gerarna.

⁶Ngkelleng, nggogo bang pè nipergeddona, karina matè rebbak dekketsa. Oda dekket nèngè barang merkadè ukum ia ipas karinana simasa i dunia.

⁷Asa, pangani sambing mo ninganna mersampang atè, ènum mo anggurmu ibagasen lolo-atè. Oda keberaten Dèbata tapi padiatken ngo Ia.

⁸Baing mo abèmu dak mbinar dekket mercuhaya.

⁹Rasaken mo kinintaboh nggelluh rebbak dekket sinibages sinikekelengen atèmu sidekkah nggelluhmu sia-sia i, siniberèken Dèbata bamu i tanoh èn. Rasaken mo sintaboh i gennep ari tukasi pè oda merguna. Kerna pellin i ngo kessa upah kelejanmu.

¹⁰Ulaken mo karina ulaenmu tuk gegohmu. Kumarna i podi ari oda lot nè pikiren bang pè bahanmu. Oda lot nèngè perbinettohen barang pè kepantasen i bekkas kalak simatè. Janah mi sidi ngo kono laus.

¹¹Lot ma ngo kuidah i dunia èn perlombaen oda ngo dak imenangken sinderras lojang, geraha oda pukpuk imenangken kalak simergegoh. Kalak mpantas oda ngo dakdak kennaen pencarien. Janah jelma pandè oda ngo dakdak kennaen kekayaen. Bagi ma ngo kalak pistar oda ngo dakdak termurmur. Kerna barang taba isè pè nggèut ngo sempa nasip sial.

¹²Oda ibettoh jelma ndigan katikana sempa. Bagè manuk-manuk tersengkik bak ikan terjala, bagidi ma ngo jelma itinggang mara, tupung ketika siso èdep jelma.

¹³Èn mo sada codien tekken bakunè kalak menghargai kepantasen.

¹⁴Lot mo sada kuta kèdèk cituk ngo pengisina. Tikan sidari lot mo sada raja mbellen menjuhap kuta i. Ikubu mo janah merkebbas-kebbas lako mengerumpakken pagarna.

¹⁵I kuta i lot ngo sada kalak sincor tapi bijak. Terpeluahsa ngo kuta i. Tapi kumarna ncor ia, ndor ngo ilupaken dèba jasana i janah sada kalak poda mernèngètsa.

¹⁶Jadi tuhu ngo kata ukurku lotien ngo kepantasen asa gegoh. Tukasi pè bagidi oda isuihken dèba kepantasen sincor. Oda lot ipatih dèba ranana.

¹⁷Lotien ngo mendengkohken rana kalak simbages nahu daripada surak sada kalak penguasa ibas pulungen jelma bungur.

¹⁸Kepantasen lebbih merguna daripada sinjata, tapi leggo sitahun siasia ibaing udan sidari.