Read Batak Dairi Ende Raja Salomo 1 Bible Online

Ende Raja Salomo 1 - Batak Dairi bible

Ende Raja Salomo 1

¹Endè termurmur karangen si Salomo.

²Sanggoh mo aku dekket bibirmu; merasaen dèng ngo kelleng atèmu daripada anggur!

³Bagè huap baungkus meliup ngo kono, bagè minak baungkus marir ngo gerarmu kemulihkenna i ngo ngkelleng atè simerbaju midah kono!

⁴Kebbas mo kita alè rajangku, embah mo aku mi bilikmu. Kemulihken kono mersampang atè ngo kami karina ninganna memoji kelleng atèmu mengelampoi anggur balo mo lekket atè simerbaju bamu!

⁵Tukasi mbèrèng, mberru ngo aku alè berru Jerusalem; tosè bagè undung-undung kalak Kedar, merandal bagè kirè-kirè i istana si Salomo!

⁶Ulang perdatèken kolingku simbèrèng i, kumarna idiang cuhaya mataniari ngo i. Melaga ngo karina turangku bangku janah mengula i pekken anggurna ngo ipasulak aku; oda lot tikkingku memangiri dagingku.

⁷Bagahkem mo alè kekelengen atèngku, i dikè ngo ko mermakan biri-birimu, i dikè ngo ipegempang kono kalak i tikan bon ari? Kasa nola bagè kalak kadap aku i tengah-tengah biri-biri sinipermakan denganmu?

⁸Kasa mak ibettoh kono bekkasna, alè ko simberruna i tengah-tengah simerbaju? Ekutken sambing mo ulbas biri-biri, janah permakani mo karina kambingmu i gembar undung-undung permakan.

⁹Alè kekelengen atèngku, bagè kuda anè-anè ngo ko simengeruah kurèta raja Mesir.

¹⁰Abèmu merlindak ibaing pakèen intan kerahongmu merandal mercimata landas.

¹¹Kupeteppaken mo emmas pakèenmu, itiktik dekket daba-daba pirak.

¹²Tikan rajangku i pedemenna, meliup-liup mo baungkus siap-siapku.

¹³Kekelengen atèngku bagè minak mur baungkusna, tikan galè ia i tentenku.

¹⁴Kekelengen atèngku tosè simpulguken bunga pancur i pekken anggur En-Gedi.

¹⁵Mberru kalohon ngo ko alè nangudangku, tuhu-tuhu mberru kalohon ngo ko! Matamu bagè ndarapati.

¹⁶Maholi ngo ko alè tampuk pusuh-pusuhku, tuhu-tuhu maholi ngo ko! Pergalè-galènta i dukut meratah.

¹⁷Kayu aras ngo tihang bagesta, kayu sempènur langit-langitna.