Read Batak Dairi Ende Raja Salomo 2 Bible Online

Ende Raja Salomo 2 - Batak Dairi bible

Ende Raja Salomo 2

¹Pellin bagè bunga merbikbiken i Saron nai ngo aku bunga sitanggang i napa-napa.

²Tosè bunga sitanggang i tengah-tengah kopi-kopi, bagi ngo kekelengen atèngku i tengah-tengah simerbaju i.

³Bagè rimo kasumba i tengah kayu i rambah, bagi ngo tampuk pusuh-pusuhku i tengah-tengah anak perana. Sennang mo aku culèndung i terruhna, buahna pè ntenggi rasana.

⁴Iembah mo aku mi perpèstaen, penengenna bangku dom kelleng atè.

⁵Pergegohi mo aku merkitè kinitenggi buah anggur, pelamlam mo aku merkitè cèmun, cioen ngo aku kumarna ntedohna.

⁶Tangan kambirangna menongkel takalku, tangan kamuhunna mengkerpi aku.

⁷Sumpahken mo alè berru Jerusalem, taba balkih dekket ringgarung i jampalen, oda kènè mengganggu kelleng atè, soh puas iakap.

⁸Dengkohken! Roh rantongku! Tosè bagè anak balkih bak anak ringgarung ngo ia. Mangkat-mangkat i delleng-delleng, murtung-murtung i uruk-uruk. Tengen, cènder ia i balik pagar, merkitè matana ia menulusi; i jerajak jendèla ngo ia merolip-olip.

¹⁰Dengkohken mengerana kekelengen atèngku bangku. Roh mo ko alè kelleng atèngku, mari mo simberrungku!

¹¹Tengen mo mosin mbergoh enggo laus mosin udan enggo lepas.

¹²Enggo ngkèrbang bunga-bunga i juma; enggo dapet tikki menggonting, sora kèrap enggo terdengkoh i tanohta.

¹³Kayu ara enggo mulai merbuah, kayu anggur meliup-liup bauna. Roh mo ko alè kelleng atèngku, mari mo ko simberrungku.

¹⁴O ndarapatingku i ruang-ruang batu, i percibonien pispis ntèrus, belli mo kuidah abèmu, dekket kudengkoh soramu, kerna abèmu merlindak, soramu mendè.

¹⁵Tangkup mo bintudar idi, bintudar kèdèk simencèdai pekken anggur, ai tupung merbunga pekken anggur nami.

¹⁶Aku sidasa kekelengen atèngku, janah aku milikna, ia mermakani biri-birina, i tengah-tengah bunga-bunga pancur

¹⁷soh menempul angin siceggen sipelausken berngin sigellap. Balik mo ko alè kekelengen atèngku, bagè ringgarung bagè anak balkih i delleng Beter.