Read Batak Dairi Ende Raja Salomo 4 Bible Online

Ende Raja Salomo 4 - Batak Dairi bible

Ende Raja Salomo 4

¹Mberru kalohon ngo ko alè kekelengen atèngku, tuhu-tuhu mberru kalohon ngo ko. Matamu ibalik tudungmu bagè ndarapati; bukmu bagè pulungen kambing, susur i uruk Gilead nai.

²Epènmu mbentar bagè simpelguken biri-biri rembaru igonting dekket iperidi; riris bagè anak biri-biri leppa, sada poda lot mbalang.

³Bibirmu mbara bagè sirambar pita mbara, janah merandal mo babahmu. Kurummu bagè buah ndalima itaka, mboni ibalik tudungmu.

⁴Kerahongmu bagè palas si Daud, sinibahan bekkas pemonien sinjata. Cimatamu bagè seribu tambeng-tambeng, karina i sinjata lubalang.

⁵Adepmu bagè dua anak balkih, anak ringgarung leppa sidang menggagat, i tengah-tengah bunga pancur.

⁶Sèkel aku laus mi delleng mur, mi uruk kemènjen, soh menempul angin sicegen, sipelausken berngin sigellap.

⁷Mberru kalohon ngo ko alè simberrungku, oda lot tikasmu.

⁸Ita mo susur i Libanon nai, alè tinandangku, ita mo susur i Libanon nai. Susur mo i babo ndelleng Amana nai, i babo ndelleng Senir nai dekket Hermon nai, bekkas biahat dahan dekket singa.

⁹Itaban ko ngo ukurku, alè impal tinandangku, itaban ko ngo ukurku merkitè penengenmu, dekket daba-daba intan i cimatamu.

¹⁰Sondel ntabohna ngkelleng atèmu impal, tinandangku, ndaoh ntabohen daripada anggur. Minakmu baungkus meliup-liup, mengelampoi karina matcam bagè rempah ratus.

¹¹Melamlam ranamu alè tinandangku, bagè tenggoli dekket susu. Pakènmu bagè baungkus Delleng Libanon.

¹²Kekelengen atèngku imo pekken merpagar, pekken merpagar, laè mata-mata terkonci.

¹³Merturahen ngo i sidi kayu ndalima, dekket buah simerasa kalohon. Bunga pancur dekket narwatsu,

¹⁴narwatsu, koning, kayu manis dekket tebbu, dekket mermatcam bagè kayu kemènjen. Mur dekket pemurpuri, bak mermatcam bagè rempah ratus pilihen.

¹⁵Takal laè i pekken merbuahken laè nggelluh menjarir i Libanon nai!

¹⁶Kèkè mo ko alè angin utara, roh mo ko alè angin selatan! Menempul mo ko i pekkenku, asa meliup-liup baungkusna. Katerra pè roh nemmu kekelengen atèngku mi pekkenna, lako kipangan buahna sintaboh i.