Read Batak Dairi Ende Raja Salomo 5 Bible Online

Ende Raja Salomo 5 - Batak Dairi bible

Ende Raja Salomo 5

¹Roh aku mi pekkenku alè impal, tinandangku, kupepulung mur dekket rempah ratusku; Kupangan cambang renggicing dekket tenggolingku. Mangan mènum mo kènè dengan-denganku, mènum mo soh mabuk ngkelleng atè.

²Meddem pè aku ukum ukurku ndungo ngo. Dengkohken, kekelengen atèngku menuktuk pèntu. Pedalngah pèntu impal, kekelengen atèngku ndarapatingku, tambaten atèngku; takalku ntaptap kumarna hembun, bukku dom irèhrèhi hembun berngin.

³Enggo kutalkasi bajungku kadè nola mo kupakkè? Nèhèngku pè enggo kuborih, mada ngo kulamuni nola?

⁴Rembekbekken atèngku kumarna ijèmak kekelengen atèngku geruk-geruk pèntu.

⁵Nai kèkè mo aku naing memuka pèntu bai kekelengen atèngku. Mur menèktèken i tangan dekket jari-jaringku nai, ntaptap mo geruk-geruk pèntu.

⁶Kubuka mo pèntu bai kekelengen atèngku, tapi enggo merbalik ia janah laus. Nteddoh kalohon aku mendengkoh sorana; kutulusi mo ia tapi sia-sia. Kudiloken gerarna, tapi oda mengaloi ia.

⁷Gabè idahi pertaram kuta mo aku, ibatbat kalak i mo aku sanga ugahen aku, irampasi kalak i mo salèndangku.

⁸Sumpahken mo alè berru Jerusalem, mula idah kènè kekelengen atèngku, bagahken mo bana sakiten naing pejumpa aku.

⁹Mèter ilampoi kekelengen atèmu mo kekelengen atè sidèban, alè simerbaju simberruna? Mèter ilampoi kekelengen atèmu mo kekelengen atè sidèban, asa idokken ko kami sanga mersumpah?

¹⁰Maholi janah ntemmes ngo kekelengen atèngku, maholien dèng ngo i tengah-tengah sipuluh ribu kalak.

¹¹Takalna bagè emmas, emmas buratda, bukna mergelombang janah mbèrèng, bagè mbèrèng kak.

¹²Matana bagè ndarapati i laè mata-mata, ndarapati meridi susu, kundul i biding bendar.

¹³Kurumna bagè pekken rempah sibaungkus, janah bagè bunga sitanggang mengerèhrèhken mur asli.

¹⁴Tanganna mparas, mercincin emmas dekket intan, badanna bagè gading itiktik dekket batu nilam.

¹⁵Nèhèna bagè tihang marmar mbulan, meralasken emmas sinitingtingi. Rua-ruana bagè mparas delleng-delleng i Libanon, dekket bagè mendè kayu arès.

¹⁶Melamlam kalohon pengeranaenna pekelleng-kelleng atè karina carana. Bagi mo kekelengen atè dekket supan-supanku, alè berru Jerusalem!