Read Batak Dairi Ende Raja Salomo 6 Bible Online

Ende Raja Salomo 6 - Batak Dairi bible

Ende Raja Salomo 6

¹Mikè laus kekelengen atèmu, alè simerbaju simberruna? Mikè laus kekelengen atèmu, asa dekket kami menulusisa?

²Mi Pekkenna ngo laus kekelengen atèngku, mi pekken rempah-rempahna lako mermakan biri-biri i pekken, dekket mengamet bunga sitanggang.

³Milik kekelengen atèngku ngo aku, janah milikku ia, mermakan biri-biri ngo ia, i tengah bunga-bunga pancur.

⁴Mberru ngo ko, alè kelemonku bagè mberru kuta Jerusalem, bagè mparasna kuta Tirzah. Mempesonaken kalohon ngo ko bagè bala pergunggung dekket sigar-sigarna.

⁵Sèolken mo abèmu bangkunai, maing bingung ngo aku kumarna penengenmu bangku. Bukmu bagè simpulguken kambing simengencuahi uruk Gilead.

⁶Epenmu mbulan bagè sinuhnuhen biri-biri rembaru igonting bak iperidi; riris bagè anak biri-biri leppa, sada poda lot mbalang.

⁷Kurummu bage serrap ndalima, alang-alang mb‘oni i balik tudungmu.

⁸Mula pe lot ennempuluh bindohara, dekket naluhpuluh siterbuang, bak simerbaju mbuè kalohon,

⁹pellin sada ngo kessa ndarapatingku, bagè atèngku, berru sada sada lemmo-lemmo inangna. Mèduk simerbaju mengidah dekket memojisa, bindohara dekket siterbuang lengang mengidahsa.

¹⁰Isè ngo siroh i codi mi mataniari mbincar, bagè merandal bulan belah purnama, percala mataniari? Mempesonaken kalohon ngo ia, bagè balapergunggung dekket sigar-sigarna.

¹¹Roh ngo aku mi pekken lada menengen muncut-muncut i napa-napa; tah enggo lot anggur i mermotik dekket benna ndalima enggo merbunga.

¹²Enggo messeng nteddohku midah ngkelleng atèmu bagè nteddohku memasang kurèta perang rebbak dekket simersangap.

¹³Tumatak mo ko alè simerbaju Sulam kumessing-kessing mo ko asa kukagumi kami. Kasa sèkel kono mengenelnelli aku sidangku tumatak i tengah-tengah barisen penonton?