Read Batak Dairi Ende Raja Salomo 7 Bible Online

Ende Raja Salomo 7 - Batak Dairi bible

Ende Raja Salomo 7

¹Ialè simerbaju mberru, mparas kalohon ngo nèhèmu dekket solopmu. Bèntuk pahamu bagè pakèen, sinibahan sada kalak pandè okir.

²Boncitmu bagè caban ngkibul oda nung kurangen anggur mercampur. Beltekmu bagè tibalen pagè ikulilingi bunga-bunga sitanggang.

³Adepmu bagè dua anak balkih bak ringgarung leppa dua.

⁴Kerahongmu bagè palas gading. Matamu bagè bendar-bendar i Hesybon i gembar pèntu pengkeruhen Batrabim. Egungmu bagè palas i Delleng Libanon simendempak mi kuta Damsyik.

⁵Takalmu bagè uruk Karmel lèammu bagè bunga berikbiken memaing lengang dekket raja.

⁶Mberru kalohon ngo kono sinikekelengen ipas sinikelemoken.

⁷Badanmu lèdang bagè batang pinang adepmu bagè persusun buahna.

⁸Sèkel aku naing menangkih batang pinang i, dekket terolih buahna i. Katerra pè bagè persusun buah anggur mo adepmu, kessahmu bagè baungkus buah apel,

⁹babahmu bagè ntenggi laè anggur. Menjarir mo anggur i bai kekelengen atèngku, pukpuk ngo oda mengadi-ngadi, janah mendungkul ngkelleng atè dekket taba kalak sienggo meddem.

¹⁰Milik kekelengen atèngku ngo aku iketedohken ngo aku.

¹¹Ita mo mi jampalen alè kekelengen atèngku, janah i juma-juma i mo kita mermalam i tengah-tengah bunga pancur.

¹²Njengkas mo kita laus mi pekken, janah menengen tah enggo mermuncut anggur, dekket tah enggo ngkèrbang bungana; tah enggo mo merbunga ma batang ndalima. I sidi mo kuberèken ngkelleng atèngku bamu.

¹³Kayu anggur baungkus meliup, i gembar pèntunta lot buah ntaboh, sienggo ndekkah ibuat dekket rembaru ibuat; kuboniken ngo i lako bamu alè kekelengen atèngku.