Read Batak Dairi Ende Raja Salomo 8 Bible Online

Ende Raja Salomo 8 - Batak Dairi bible

Ende Raja Salomo 8

¹Nong lèh, ukum turangku kaloen kin ko nung menusu taba inangku, kennah kusanggoh ngo ko mula pesimbak i dalan, oda lot simengelèai aku.

²Kennah kuarahken ko mi bages inangku, asa ndorok iajari kono aku. Kuberèken mo mènum anggur ko dekket laè buah ndalima.

³Tangan kambirangmu menongkel takalku tangan kamuhunmu mengkerpi aku.

⁴Sumpahken mo alè berru Jerusalem, magahken oda mengganggu ngkelleng atè kènè soh puas iakap.

⁵Isè ngo siroh i padang gurun nai tunandè taba kekelengen atèna? Kudungoi ko i terruh kayu sampuraga bekkasmu i kurungen manik bak itubuhken.

⁶Baing mo aku tampuk pusuh-pusuhmu, ulang kerpi sidèban laènken aku; ai dos ngo gegoh ngkelleng atè i bagè kemagoen janah napsu merkuasa bagè kematèen. Njolahna bagè pergollah api lakat njolah kalohon.

⁷Laè mbellen pè oda terènteppensa ngkelleng atè, dekket laè mengeraja pè oda teranunsa i. Mula lot sada kalak memerèken karina hartana lako menokor ngkelleng atè pasti pellin kememalu ngo dapetsa.

⁸Lot ngo turang nami sada daberru kètèk dèng ngo adepna. Bakunè mo kubaing bana mula roh kalak mengeriritsa?

⁹Ukum dingding batu kin ia kupajek kami mo palas pirak i babona. Ukum pèntu pengkeruhen kin ia kubaing kami mo gerruk-gerrukna kayu arès.

¹⁰Dingding batu ngo aku, janah adepku ngo palasna. Ibettoh kekelengen atèngku ngo sennang ukurku mula bana.

¹¹Lot ngo pekken anggur si Salomo i Baal-Hamon isohken ngo pekken i taba simenjagasa. Gennep ngo kalak i menggarar seribu riar hasilna,

¹²janah terolih dua ratus upah kelejaenna. Bamu mo riar i alè Salomo, dekket bai simenjaga pekkenmu. Tapi pekken anggurku, milikku ngo silot i hadeppenku.

¹³Kènè alè simengiani pekken, sèkel ngo dengan mendengkoh soramu; pedengkohken mo idi baku!

¹⁴Alè kekelengen atèngku, roh mo bagè regarung bagè anak balkih i delleng-delleng Beter.