Read Batak Dairi Jesaya 1 Bible Online

Jesaya 1 - Batak Dairi bible

Jesaya 1

¹Isi bukku èn imo tennah tersèngèt Juda dekket Jerusalem sinipetarar Dèbata bai si Jesaya anak si Amos, tikala si Usia, si Jotam, si Ahas dekket si Hizkia memerèntah Juda.

²Dengkohken mo alè langit, peratè-atèken mo alè tanoh! Idokken JAHOWA, “Dukak-dukak sienggo kudèdah mengalo taba aku.

³Salang lembu itandai simermakanisa, kalodè pè itandai ngo persoburenna sinipèmaken tuanna. Tapi ukum bangsangku Israel, oda lot iarusi kalak i.”

⁴Merjaya mo kènè alè bangsa simerdosa, kènè jelma luhlah janah jahat! Enggo mo merolpek kènè kumernaken dosa ndènè. Enggo itulak kènè JAHOWA janah itondali kènè Dèbata Simbadia si kennah isembah kènè.

⁵Kasa kènè dak mengalo-ngalo sambing? Naing berraten dèng ngo hukum sinaing mengenna bai ndènè? Takalmu enggo dom buruk, enggo cion atè-atè dekket pikirenmu.

⁶Mulai i babontakal nai soh mi tapap-tapap nèhèmu oda lot nèngè merkinijuah, dom baroh dekket ugah. Ugahmu i madèng ipebersih barang ibalut, madèng ma idauni dekket minak.

⁷Nagerri ndènè pè enggo mo ibinasaken; kuta ndènè pè enggo ilekkup kerri. Ipetengen-tengen matamu ngo kalak mengerampasi tanoh ndènè janah mencèdai karinana.

⁸Pellin Jerusalem nai ngo kessa tading, tapi kuta sienggo terkubu dekket oda nè mergegoh, tosè bagè sapo-sapo i pekken anggur barang sapo-sapo i pekken cèmun.

⁹Ukum oda kin lot ipaluah JAHOWA siperkuasa i barang piga-piga kalak banta, enggo kin mo tumpat kita karina, bagè Sodom dekket Gomora.

¹⁰Alè Jerusalem, pengulu dekket bangsamu enggo mo bagè Sodom dekket Gomora. Dengkohken mo sinidokken JAHOWA bamu; peratè-atèken mo sinipedahken Dèbatanta.

¹¹Idokken JAHOWA, “Idokdok atèmu lolo aku midah karina pèlèen sidak ipèlèken kono bangku? Enggo bauen aku midah biri-biri pèlèn situtungenmu dekket pessoh anak lembumu. Daroh lembu jantan, biri-biri dekket kambing oda lemmo atèngku.

¹²Isè pasulakken kènè merembah karina pèlèen i tikan roh kènè mersembah taba aku? Isè pasulakken kènè merlaus roh mi Bagesku Simbadia i?

¹³Sia-sia ngo iembah kènè pèlèen i. Moyang atèngku bauna i. Nggogo atèngku janah oda tertengen aku kènè memèstaken Peltak Bulan, ari Sabat dekket ari raya perpulungen agama. Karina ngo i enggo ilamuni kènè dekket dosa ndènè janah gabè boban bangku; enggo ledja aku menarapi.

¹⁵Mula ipekèrbang kènè tangan ndènè lako mersodip, oda uè nè aku mendengkohken, ai enggo mèduk ibunuh kènè merkitè tangan ndènè i.

¹⁶Petadi mo karina kejahaten siniula ndènè i, Uè, ulang nè mengulaken jahat,

¹⁷guruken mo maing mendè. Pecèndek kènè mo ketègerren janah alo kènè mo penèndessen, berrèken mo bai anak melumang hak kalak i janah bèla mo perkarana.”

¹⁸Idokken JAHOWA ngo, “Siselangsaèken mo perkara èn. Tukasi pè kènè mbara bagè kaèn mbalo kumara dosa ndènè, kuuras ngo kènè gabè mbentar bagè kapas. Tukasi pè dosa ndènè i mbuè janah mbotong, kusasa ngo karinana i.

¹⁹Ukum iuèi kènè aku, irasaken kènè mo karina kinitaboh hasil nagerri ndènè simendè i.

²⁰Tapi mula ialo kènè aku, matè mo kènè i pergerahaen. Aku ngo JAHOWA mendokken i.”

²¹Kuta setia arnia, bagèndari enggo gabè perkendangen! Arnia karina pengisina ntèger janah bujur, tapi bagèndari enggo perbekkasen jelma pemunuh.

²²Alè Jerusalem, arnia bagè pirak ngo ko, tapi bagèndari oda nèngè maharga. Arnia bagè anggur merasa ngo ko, tapi bagèndari enggo dosken laè manihan.

²³Pengulu-pengulu ndènè gabè penggutturi dekket dengngan-dengngan penangko; lolo ngo kalak i menjalo sisip. Oda uè kalak i mempebèlai sitading melumang i kerungguen; oda uè mendengkohken pe- ngaduen daberru mbalu.

²⁴Kumarna i JAHOWA Pergegoh Siso tercodi, Dèbata Israel mendokken, “Kènè alè musuh-musuhKu, bales dendam mo Aku taba kènè asa ulang nenge dak menusahi Aku.

²⁵Kulaluken mo pemaingku taba kènè. Tosè bagè kalak meningtingi, bagi mo kènè Kutingtingi; karina sikotor kennah Kupesisi bai ndènè nai.

²⁶Kuberèken nola mo bai ndènè sijèmak hukum dekket pengajari bagè tikalai. Nai igerari dèba mo Jerusalem kuta adil janah setia.”

²⁷Adil ngo JAHOWA, ikelini ngo Jerusalem dekket kalakna sipeselsel.

²⁸Tapi kalak perdosa simenelbuhsa kennah ibinasaken janah karina simenadingkensa kennah ipetumpat.

²⁹Kennah termèla mo kalak simersembah taba kayu ntemtem dekket simemaing pekkenna gabè persembahen bai gana-gana.

³⁰Nai bagè kayu mbellen merakar mo kalak i dekket bagè pekken siso merlaè.

³¹Bagè nggala pagè messeng ibaing bunga api simpistik, bagi mo jelma penguasa kennah ibinasaken pengelakona jahat i, janah isè poda ndorok mengantak permagona.