Read Batak Dairi Jesaya 10 Bible Online

Jesaya 10 - Batak Dairi bible

Jesaya 10

¹Merjaya mo kènè simemaing hukum siso ntèger lako menèndes bangsangKu. Merkitè bagidi gabè ikilang kènè ngo sincor asa ulang lot hakna dekket oda sènteng hukum bana, janah irampasi kènè ngo milik daberru mbalu dekket simelumang.

³Kadè mo ibaing kènè tupung ari perhukumen Dèbata taba kènè? Bakunè pemaingmu tikan roh ibaing olpek i nagerri sindaoh nai? Taba isè ngo kènè mengido urup. Mikè mo iboniken kènè kinibèak ndènè i?

⁴Nasipmu pellin bunuhen tupung geraha ngo barang ièkèt-èkèt bagè taban-tabanen. Tapi tong dèng ngo melaga JAHOWA janah menghukumi.

⁵Nina JAHOWA, “Merjaya mo Assur! Kupakkè kin ngo Assur mahan ligas-ligas dekket palu-palu lako memalu jelma sikulagai.

⁶Kutenges ngo Assur lako menjuhap bangsangKu simerbalik i dekket simemaing aku gabè melaga. Kupasulak ngo Assur lako memangus dekket menangko bak mende- dohi bangsangku bagè abu i tengah ndalan.”

⁷Tapi lot ngo sura-sura raja Assur. Itaki ngo lako maing gegoh dekket mengeripurken nterrem bangsa.

⁸Ipedates ngo dirina, janah idokken, “Karina raja-raja ngo lubalangku!

⁹Kutaban ngo kuta Kalno dekket Karkemis, Hamat dekket Arpad. Kutaban ma ngo kuta Samaria dekket Damsyik.

¹⁰Kutaluken ngo kerajaen-kerajaen simersembah taba bègu simergegohen dèng daripada silot i Jerusalem dekket i Samaria.

¹¹Samaria dekket karina sembahenna enggo mo kurabbatken. Bagi mo kubaing i Jerusalem dekket karina gana-ganaen sinisembahna i sidi.”

¹²Tapi idokken JAHOWA, “Mula enggo pul sinaing kubaing i mi Uruk Sion dekket i Jerusalem, kuhukum mo raja Assur kumerna kejukkatenna dekket ketunggangenna i.”

¹³Merkata manggang ngo raja Assur, ai nina, “Karinana i kubahanken kerna kuasangku sendiri. Bijak dekket pandè ngo aku. Kuapusken perbalengen bangsa janah kurampasi ngo harta kalak i. Kupesampur ngo raja rajana.

¹⁴Tosè bagè asar manuk-manuk ngo bangsa-bangsa sini dunia èn; murah ngo kuakap mengerampasi harta kalak i, tosè bagè mengaum naruh sinitadingken i asar. Oda lot mengkurpasken kabengna, oda lot memuka pagutna barang piak-piak.”

¹⁵Tapi nina JAHOWA ngo, “Terbaing takkè ngo ndia gegah meradepken jelma simemakkèssa? Mahargaen nola ngo garagaji asa jelma simenggunakensa? Oda ngo palu-palu mengantan jelma, tapi jelma ngo mengantan palu-palu.”

¹⁶Kumerna ipegegah kalak Assur dirina, JAHOWA Pergegoh Sisotercodi mo maing roh sakit lako menghukum lubalang-lubalang sitegap-tegap i. Panè jantanen mo kalak i tosè bagè api menutungi.

¹⁷Dèbata simbadia, Cuhaya Israel mo gabè bagè dilah api mengelekkup kerri karinana ibagasen sidari, soh mi karina rambah merdori-dori.

¹⁸Karina rambah talintua dekket juma nggabur i nagerri Assur kennah isalpuni, bagè kalak sicioen merdenden soh matè.

¹⁹Cituk nai ngo kessa kayu tading, ndorok terbilang anak-anak.

²⁰Roh mo tikkina, oda nèngè merkinisohna sima-sima bangsa Israel simaluah i taba bangsa simerkuasa sinaing menumpatken kalak i, tapi tunandè bai JAHOWA Simbadia Israel ngo.

²¹Gabè tobat mo sima-sima bangsa Israel sicituk i taba Dèbata pergegoh i.

²²Tukasi pè bagèndari kalak Israel dos buèna bagè kersik i biding laut, pellin cituk ngo kessa balik. Enggo ndessing ari perhukumen JAHOWA, jadi patut janah adil ngo iriputken bangsa i.

²³Tuhu ngo, naing irabbatken JAHOWA Pergegoh Sisotercodi suberri nagerri i; enggo itetapken JAHOWA i, oda nèngè terobah.

²⁴Idokken JAHOWA Pergegoh Sisotercodi ngo taba ummatNa simerian i Sion, “Ulang kènè mbiar taba kalak Assur, tukasi pè itèndes dekket isiksa kalak i kènè, bagè pemaing kalak Mesir arnia.

²⁵Ndor ngo malap lagangku bamu, nai Kubinasaken mo kalak i.

²⁶Aku JAHOWA Pergegoh Sisotercodi mengeligas kalak i merkitè ligas-ligas bagè sikurotan i kalak Midian i delleng batu Oreb. Assur kennah Kuhukum, bagè Mesir si kuhukum i.

²⁷Tikan ari i mo kupaluah kènè ipas perhambaen Assur nai, jadi oda nè merkuasa kalak i bai ndènè.”

²⁸Kuta Ayat enggo itaban soridadu Assur. Enggo mo ilausi kalak i Migron! Bekkel kalak i itadingken i Mikhmas!

²⁹Enggo ilausi kalak i peneberangen janah mermalam i Geba! Menggirgir pengisi kuta Rama, janah pengisi Gibea kuta Raja Saul enggo mperrus.

³⁰Mersurak mo kènè alè pengisi Galim! Dengkohken mo alè pengisi Laisya! Aloi mo, alè pengisi Anatot!

³¹Pengisi Madmena dekket Gebim mperrus mbungkas.

³²Ari èn musuh enggo i kuta Nob, janah ikupul kalak i mo tènju-tènjuna i sidi mi Uruk kuta Sion, mi kuta Jerusalem.

³³Irumpakken JAHOWA Pergegoh Sisotercodi ngo kalak i bagè dahan kayu ituhtuhi. Sindatesna bai kalak i nai kennah itabah janah ibulakken.

³⁴Irèboh JAHOWA ngo kalak i bagè kayu i tengah rambah merkitè takkè. Mula pè mpihir kalak i bagè kayu simpihirna i Libanon, kennah mbulak ngo kalak i.