Read Batak Dairi Jesaya 11 Bible Online

Jesaya 11 - Batak Dairi bible

Jesaya 11

¹Pemparen si Daud tosè bagè kayu sienggo itabah. Tapi bagè tunas siturah i tongkoh nai, bagi ma mo i pemparen si Daud nai mbangkit sada raja.

²Kuasa JAHOWA mo menegguneggusa memaingsa merpengantusien dekket bijak pandè maing keputusen bak mengulakensa; ibettoh ngo lemmo atè Dèbata janah merkebiaren bana.

³Lemmo atèna imo merkebiaren midah JAHOWA. Oda menghukum ia pellin mi penengen mata barang kumarna kata ni dèba.

⁴Adil ngo hukumna taba kalak sincor, isampati ngo jelma ndotè dekket bujur; jelma persalah ihukum merkitè perèntahna jelma perjahat iripurkenna.

⁵Dak adil janah setia ngo ia ipas karinana.

⁶Sorigala pè rebbak mo dekket biri-biri, biahat pè gempang i gembar kambing. Anak lembu rebbak menggagat dekket anak singa, janah anak-anak ngo mermakan i karina.

⁷Lembu rebbak menggagat dekket geppul, anak-anakna rebbak mergempangen Singa pè menggagat bagè lembu.

⁸Anak mbara pe oda ikekadè mula kumiali igembar nipè merbisa.

⁹I Sion, Uruk Simbadia Dèbata oda lot nèngè perjahat barang pencèdai. Dom perbinettohen tersèngèt Dèbata mo suberri nagerri bagè laè mendomi laut.

¹⁰Roh nè mo tikkina sada raja pemparen si Daud gabè tampuk pemikiren karina bangsa. Merrohen ngo kalak i mendahisa, janah ipoji-poji mo bekkasna merian.

¹¹Tupung ari i ipakkè JAHOWA ngo kuasaNa merembah balik bangsaNa sitadingna idi i Assur dekket i Mesir, sini nagerri Patros, Sudan dekket Elam, i Babel, Hamat dekket sinipulo-pulo ndaoh i.

¹²Ipecèndek JAHOWA mo sada binangun bai bangsa-bangsa. Imo tandana ipepulung nola mengolihi bangsa Israel dekket Juda simersèrak i dèsa siualuh i tanoh èn janah merembah kalak i balik.

¹³Oda nè mercian atè kerajaen Israel taba Juda janah Juda oda nèngè mermusuh taba Israel.

¹⁴Rebbakken mo kalak i menjuhap kalak Palistin i kesunduten dekket mupusi bangsa-bangsa i kebincaren. Italuken kalak i mo bangsa Edom dekket Moab, janah bangsa Amon patu bai kalak i.

¹⁵Ikerrahi JAHOWA mo Suak Suez. Ibaing mo sapa-sipu angin nggara gabè pitu nola mo batang Laè Efrat tapi mbabo, janah gennep jelma ndorok meneberangisa kasi pè mercipatu.

¹⁶Lot ngo dalan mbellen bai bangsaNa sitadingna i lako karuar i Assur nai, tosè bagè tikan karuar kalak Israel i Mesir nai.