Read Batak Dairi Jesaya 13 Bible Online

Jesaya 13 - Batak Dairi bible

Jesaya 13

¹Bagèen ngo tennah Dèbata sinijalo si Jesaya anak si Amos tersèngèt Babel:

²Pekèrbang mo mandèra perang i babondelleng sienggo gundul! Diloken mo taba karina soridadu janah pekustang tanganmu asa ijuhap kalak i pèntu pengkeruhen kuta sijukkat i.

³Enggo mo idiloi JAHOWA lubalang lubalang pilihenNa. Mahantu ngo kalak i, tok mi dirina janah ndorok igegahken. Idokken JAHOWA ngo taba kalak i asa ihukum jelma sikenna lagana.

⁴Dengkohken sora mèngèr i delleng, bagè sora pulungen jelma nterrem. Dengkoh mo kerajaen dekket bangsa-bangsa simertumpu. JAHOWA Pergegoh Sisotercodi memerèso soridadu.

⁵Merohen kalak i punca-punca tanoh èn nai. Ibagasen pungurNa, ipakkè JAHOWA ngo kalak i lako mengerabbatken suberri tanoh èn.

⁶Tangis milangi mo kènè, kumarna enggo ndessing ari JAHOWA i, imo ari kemagoen siniperoh JAHOWA Pergegoh Sisotercodi.

⁷Gennep jelma mengakapken matè tanganna janah mbalang keberaninna.

⁸Sempa ngo buradan bai kalak karina, dekket mengennat-ngennat bagè daberru rabisen. Mersitengennen ngo kalak i ibagasen mbiar, abèna mbara kumarna mèla.

⁹Roh nè mo ari JAHOWA janah tupung ari i mo ibalesken JAHOWA lagaNa dekket pungurNa. Gabè ndhagal mo tanoh èn, janah ibinasaken karina jelma perdosa.

¹⁰Karina bintang dekket barisen bintang i pè oda nè mercuhaya; gellap mo mataniari tikan mbincar, bulan i pè mak nè mercuhaya.

¹¹Nina JAHOWA, “Kuhukum mo dunia èn kumerna kejahatenna, bang jelma perjahat kumerna dosa kalak i. Jelma sindates perukuren kennah Kupeterruh, kalak jukkat bak kejam kennah Kuhukum.

¹²Cituk kalohon ngo kessa jelma ipaluah, cituken ngo kalak i daripada emmas pèlangki.

¹³Menggirgir mo kubaing langit janah dumegger tanoh èn i bekkasna ipas arinkenna Aku JAHOWA Pergegoh Sisotercodi, pacidahken lagangKu.

¹⁴Barat-burut mo kalak sidèban simerian i Babel janah mperrus mi nagerrina gennep. Tosè bagè balkih ngo kalak i mperrus mabaken rèrèna bai perburu nai, barang bagè pulungen biri-biri siso lot mermakan.

¹⁵Barang isè sambing tertangkup kennah itikam soh matè.

¹⁶Ipetengen-tengen kalak i ngo anak mbara kalak i iledda, bages kalak i pè isamun, dekket sinibages kalak i pè irampok.”

¹⁷Idokken JAHOWA, “Kudungkul mo ukur bangsa Madai lako menjuhap Babel. Oda tersisip kalak i merkitè pirak barang emmas.

¹⁸Ibunuh kalak i mo simatah daging merkitè panah. Oda ngkelleng atè kalak i midah anak mbara janah oda mermasèh atè midah anak-anak.

¹⁹Ipas karina kerajaen, Babel mo simerandalna dekket gabè ièndèlken pengisina. Tapi Aku JAHOWA ngo mengerabbatken i, bagè sienggo kubaing taba Sodom dekket Gomora.

²⁰Sada kalak nè poda lot tading i sidi. Kalak Arab pengeranto pè memahan undung-undung ngo i sidi, permakan pè oda lot mengarak kambingna bak biri-birina lako menggagat i sidi.

²¹Gabè bekkas binatang meriar mo bekkas idi. Lengkupa nai ngo merasar i bages kalak i dekket manuk-manuk unto mo merian i sidi. Regarung mo miskal-miskal i kelang-kelang simerumpaken i.

²²Aung biang meriar dekket sorigala mo merginoling i palas dekket istana istana Babel nai. Dapet nè mo ketika simasa i, janah oda nè tersondaten tikkina.”