Read Batak Dairi Jesaya 14 Bible Online

Jesaya 14 - Batak Dairi bible

Jesaya 14

¹Masèh ngo atè JAHOWA midah Israel ummatNa i, janah ipilih nola ngo kalak i mengolihi gabè milikNa. Iulakken nola ngo kalak i mengiani nagerrina sendiri. Kalak sidèban pè gabè merohen mo asa rebbak dekket kalak i.

²Mèduk ngo bangsa mengurupi kalak Israel asa balik mi nagerri sienggo iberrèken JAHOWA bai kalak i janah iperhamba kalak Israel mo bangsa-bangsa i. Itaban kalak Israel mo kalak sinung menabansa janah iperèntah mo kalak sinung mendèrsasa.

³Ipaluah JAHOWA mo bangsa Israel ibas simbernit dekket kinimpersahna nai, dekket ipas ulaen mbotong sinipaksaken bana.

⁴Enggo kessa ipesaut JAHOWA i, gabè bagèen mo pengerèhèi kalak i taba raja Babel, “ Enggo ndabuh pellang-pellang raja kejam i! Oda nè terbaingsa mendersa.

⁵Enggo ipetadi JAHOWA pemerèntahen raja-raja jahat i,

⁶ai merdengngan laga itèndes ngo bangsa-bangsa janah dak i dersa ngo kalak i.

⁷Ujungna mènak mo suberri dunia èn, janah gennep jelma merendè sampang atè.

⁸Kayu sempènur dekket kayu arès Libanon mersampang atè kumerna enggo ndabuh pellang-pellang raja kejam i, janah enggo kessa matè ia oda nè mo lot pasulakken menabahi kalak i!

⁹Rami mo bekkas jelma sienggo matè i menimbak-nimbak raja Babel i. Nai ndungo mo sumangan jelma simerkuasa i tanoh èn arnia, dekket sumangan raja pè kèkè mo i tahta kalak i nai.

¹⁰Karina kalak i mendiloken tabasa, ‘Oè! Bagèndari enggo bagè kami kono, ndotè, janah oda nè merkessah!

¹¹Arnia ipesangap ngo kono merkitè oning-oningen kucapi, tapi bagèndari enggo merian ipas simelongo i kematèen. Olong-olong mo mahan peddèmenmu janah goya mo mahan cabingmu.’

¹²Alè raja Babel, ukum arnia bagè bintang pelambuk ngo ko mercala-cala, tapi bagèndari enggo ndabuh i langit nai! Ukum arnia italuken ko ngo bangsa-bangsa, tapi bagèndari enggo ipatakken mi tanoh.

¹³Iharkatken kono ngo laus mi langit memahan tahtamu i babo bintang sindatesna! Idok atèmu ngo terbaing ko kundul bagè raja i babo delleng si kan utara, bekkas sembah-sembahen merpulung.

¹⁴Nimu naing laus kono mi babo hembun asa gabè tosè bagè Sindatesna i!

¹⁵Keppèken ilebukken ngo ko mi bekkas simbagesna kalohon i dunia simatè.

¹⁶Itengen janah inelnelli kalak sinisidi mo ko. Mengkuso mo kalak i, ‘Èn ngo keppè kalakna simenggontarken tanoh èn dekket simenggontarken karina kerajaen?

¹⁷Ia ngo simenggeppui kuta mbellen dekket mengobah dunia gabè padang gurun? Ia ngo ndia siso nung paluahken sinitabanna barang memelli kalak i balik?’

¹⁸Karina sienggo nung gabè raja sada bangsa meriah ngo itanem i perkuburenna gennep,

¹⁹tapi ukum kono oda lot pendèbanmu, bagi sambing mo ipatakken bangkèmu bagè tunas sinipatakken, itambusi bangkè soridadu simatè ibas geraha, iambongken mi liang batu rebbak dekket kalak i, bagè bangkè siterdedohen.

²⁰Kono ngo membinasaken nagerrimu dekket memunuh bangsamu sendiri. Kerna ni ukum kono oda ngo ikubur bagè raja-raja sidèbankenna i. Sada kalak poda sincelketmu sijahat i ipaluah.

²¹Ndor nèngè mo pungkahenna lako mengerabbatken! Anakmu dekket berrumu matè kumarna dosa empung kalak i. Isè poda bai kalak i nai gabè raja i tanoh èn barang pè memajek kuta.”

²²Idokken JAHOWA Pergegoh Sisotercodi, “Kujuhap mo Babel janah soh mersep kubaing. Sada kalak poda Kupaluah, soh mi anak-anak oda Kupaduè nggelluh. Aku JAHOWA ngo mendokken i.

²³Kubaing mo Babel gabè rabang perbekkasen lengkupa. Kusapu mo mbersih Babel. Aku JAHOWA Pergegoh Sisotercodi ngo sienggo mendokken i.”

²⁴Enggo isumpahken JAHOWA Pergegoh Sisotercodi: “Karina sienggo kusura-surai kennah saut.

²⁵Kalak Assur silot i nagerringku Israel kennah Kubinasaken, janah silot i delleng-dellengKu i pè kennah kudedohi. Kupaluah mo bangsangKu ipas pendersa embahen sinipaksaken kalak Assur bai kalak i.

²⁶En mo sinaing kubaing mi dunia èn; kupekustang mo bettekkenku lako menghukum karina bangsa.”

²⁷Enggo itetapken JAHOWA Pergegoh Sisotercodi maing bagidi. Ipekustang mo tanganNa lako menghukum, janah sada kalak poda ndorok menondatisa.

²⁸Èn mo tennah itingtingken tikan i tahun permatè raja Ahas.

²⁹Alè bangsa Palistin enggo penggel palu-palu sinipakkè memalu ko. Tapi ulang ko lolosu, kerna mula matè sada nipè, roh nola mo gancihna nipè lebbih merbisa janah naruh nipè memerper naga merkabeng.

³⁰Sempa mo bai ndènè lèhè matè kocing, janah jelma sitadingna i pè kennah terbunuh. Balikna nola jelma sincorna i kin pè ipas bangsa JAHOWA nai gabè terolih panganen, janah jelma sindotè i nggeluh merkemènaken.

³¹Tangis mo kènè janah mersurak mo mengido urup, alè kalak Palistin! Gontar mo kè karina! Merkabangen mo hembun abu i utara nai, tandana roh soridadu musuh, oda lot perbiar bai kalak i.

³²Bakunè mo pengalointa taba pasulakken siroh bai bangsa Palistin nai? Sidokken mo taba kalak i, enggo ipekkadè JAHOWA Sion, janah bangsaNa simenggong ndersa i pè terolih penjamotien mo i si.