Read Batak Dairi Jesaya 16 Bible Online

Jesaya 16 - Batak Dairi bible

Jesaya 16

¹I kuta Sela nai i gurun pasir, itengesken bangsa Moab ngo anak biri-biri mahan hadiahna bai raja i Jerusalem.

²Kalak Moab memèma i biding laè Arnon ninganna merdalan-dalan linglung bagè manuk-manuk sinialai i asarna nai.

³Idokken kalak i ngo taba bangsa Juda, “Dokken mo kadè sibahanen nami. Gabè perculenggemmen nami mo kènè tikan nggara tengkes ari, janah belli mo kami merian i terruh lenggemmenmu. Ai kalak ginemgem ngo kami; kelini mo kami, janah ulang selbuh kami.

⁴Paduè mo kami menompang i nagerrimu. Legenni mo kami meradepken kalak sinaing mengeripasken kami.” (Mengadi mo penèndessen deket mengeripasken, janah kalak sinaing mengeripputken dekket menèndes nagerri Israel kennah mersep mo.

⁵Enggo kessa i lot mo sada kalak i pemparen si Daud nai mbangkit raja, janah ia memerèntah bangsana ibagasen kelleng dekket setia. Ipecèndek mo ketègerren janah isudu ngo memaing bennar).

⁶Nai idokken bangsa Juda mo; “Enggo kudengkoh kami tersèngèt kejukkaten bangsa Moab. Kubettoh kami ngo jukkat janah ndates ukur kalak i. Cakapna pè pellin bual ngo, oda merlapaten.”

⁷Kernana i belli mo bangsa Moab i mer- tangisen. Belli mo kalak i tangis mula terè- ngèt ia mi pangan merasa sienggo ncemmal ipangan kalak i i kuta Kir-Hareset. Belli mo kalak i mendellè dekket mendeherreng.

⁸Enggo ibinasaken juma sinigembar Hesybon dekket pekken anggur Sibma, imo pekken simenghasilken anggur simendèna lako bai penguasa-penguasa bangsa dekket simemaing kalak i mabuk. Ukum arnia soh ngo mi Jaezer pekken anggur i; mi kebin- caren soh mi padang gurun, janah i kesunduten soh mi kèparen Laut Matè.

⁹Kutangisi ngo bagèndari kayu anggur i Sibma bagè aku menangisi Jaezer. Ndabuh ngo eluhku kumernaken Hesybon dekket Eleale, kumarna kerri hasil tanohna ipangan musuh.

¹⁰Sada kalak poda lot nè mersampang atè i peken-pekken anggur i. Oda lot simersurak-surak bang merendè i pekken anggur. Oda lot simemerroh anggur muat laèna. Enggo kupetadi oang-oang kalak i.

¹¹Melala ngo atè-atèngku mengidah simasa i Moab dekket Kir-Heres.

¹²Ledja ngo iakap kalak Moab mengenangkengi uruk pemèlèen mi bekkas kalak i mersodip, tapi oda lot gunana.

¹³Bagi mo iboa-boaken JAHOWA kin tersèngèt Moab.

¹⁴Bagèndari idokken JAHOWA, “Gertip telu tahun nai, karina kinibèak sinigegahken Moab kennah salpun. Jelma pengisina si mbuè i kin, gabè cituk nai ngo janah oda nè merkegegohen.”