Read Batak Dairi Jesaya 17 Bible Online

Jesaya 17 - Batak Dairi bible

Jesaya 17

¹Idokken JAHOWA, “Ukum Damsyik oda nèngè kuta mbellen, tapi pellin singguk-guken perkayu bages merumpak nai ngo.

²Kuta silot i Siria kennah itadingken soh mi amman sumendah janah gabè bekkas pulungen pinakan, sada kalak poda lot mengalaisa.

³Kebennèen perculendungen mo Israel janah Damsyik kebenèen kerajaen- na. Kalak Siria sitadingna i merlèa mo per- nggelluhna bagè kalak Israel. Aku JAHOWA Pergegoh Sisotercodi ngo mendokken i.”

⁴Nina JAHOWA dèng, “Roh mo tikkina salpun ketermurmuren Israel dekket kinidumana i pè maknè lot.

⁵Tosè bagè juma sini Refaim sienggo kerri iperani pagèna mo Israel janah pellin cituk nai ngo kessa tading.

⁶Tosè bagè zaitun sienggo kerri itapu buahna, nai tading mo barang piga-piga ngkabuah nai alpungna i punca dahanna, bagi mo Israel pellin cituk nai ngo kessa maluah. Aku, JAHOWA Dèbata Israel ngo sienggo mendokken i.”

⁷Tupung ari i balik mo jelma mengido urup taba Situmempasa, imo Dèbata simbadia Israel.

⁸Oda nèngè mo iharapken kalak i hasil ibas sinibahan tangan kalak idi, imo langgaten bekas menutung dahupa, dekket gana-gana Asyera.

⁹Tupung ari i, kuta gotting Israel sintegguh i gabè merumpak janah melongo, bagè kuta sinitadingken kalak Hewi deket Amori tikan mperrus kalak i bai kalak Israel nai.

¹⁰Alè Israel enggo ilupaken ko Dèbata sipaluahken dekket simengurupi ko tosè bagè delleng batu ntegguh. Balikna nola tupèh gabè isuani ko dèng ngo pekken lako bai bègu sembahenmu.

¹¹Tapi tukasi pè suan-suanen i mènter mertunas dekket merbunga sidarinkenna i suan kono i, tapi oda ngo lot buahna. Pellin kesusahen dekket ncio ukur siso merkeri-kerrien mo kessa dungna.

¹²Mèngèr ngo bangsa-bangsa simergegoh i; merderrem sorana bagè sora galombang laut mahantu.

¹³Mi lebbè mo kalak i bagè laè mengeraja mbellen kalohon. Tapi iasup Dèbata ngo kalak i, nai mperrus mo kalak i ndaoh kalohon. Iletlet mo kalak i bagè ronci ikabangken angin i pispis delleng, barang bagè abu sinikabangken topan.

¹⁴Tikan bon ari perohken buradan ngo bai kalak i, tapi mayak siceggen enggo mersep kalak i. Bagi mo jalonken gennep jelma simupusi kita.