Read Batak Dairi Jesaya 18 Bible Online

Jesaya 18 - Batak Dairi bible

Jesaya 18

¹Isada nagerri i keparen Laè Sudan nai terdengkoh mo merdengung sora kabeng.

²Roh ngo i nagerri i nai suruhen arap Laè Nil ibagasen perau-perau pandan. Alè pasulakken mpantas, ndor mo kènè balik mi nagerri ndènè sinidates laè i. Embah mo sada tennah bai bangsamu kalak lubalang i, kalak jelma nggeddang janah merkoling melèmus dekket ikebiari suberri dunia.

³Kènè alè karina simengiani tanoh èn! Perdatèken mo mula ipekerbang mandèra i babo delleng! Dengkohken mula merkata sarunè!

⁴Idokken JAHOWA ngo taba aku, “I bekkasKu i dates nai, Kutatap mo mi terruh ninganku sip, bagè persip hembun ngkimpal tupung berngin mukup i mosin peranien, janah bagè percala cuhaya mataniari tikan mahar.

⁵Sinderrang madèng mosin buah, tikan enggo merurus bungana janah buah anggur madèng ntasak i batangna, italuken musuh mo Sudan, bagè murahna golok menggetapi ranting-ranting i batang anggur nai.

⁶Bangkè-bangkè soridadu bagi sambing mo itadingken ipangani manuk-manuk i mosin lego dekket binatang i mosin mbergoh.”

⁷Roh mo tikkina ipèlèken pèlèen bai JAHOWA Pergegoh Sisotercodi i nagerri sinibentas laè idi nai, bai bangsana simergegoh janah mahantu idi nai, bai kalakna kalak nggeddang janah merkoling melèmus sinikebiaren suberri dunia. Roh ngo kalak i mi Uruk Sion mi bekkas JAHOWA Pergegoh Sisotercodi isembah.