Read Batak Dairi Jesaya 19 Bible Online

Jesaya 19 - Batak Dairi bible

Jesaya 19

¹Èn mo tennah tersèngèt Mesir. Roh ngo JAHOWA mi Mesir memasang hembun ndèas kalohon. Menggirgir mo gana-ganaen Mesir i hadeppenNa janah kètèk mo atè kalak Mesir.

²Nina JAHOWA, “Kubaing mo samah-samah kalak Mesir mergeraha. Merubat mo sisibeltek, merubat sipegembar sapo, kuta mengalo kuta dekket kerajaen mengalo kerajaen.

³Kusondat mo karina sura-sura Mesir janah memaing nduhduh ukur kalak i. Ipido kalak i mo pe- ngurupen bai gana-gana, mengido ajar dekket peddah bai guru-guru dekket kesandaren.

⁴Kusohken mo Mesir mi tangan sada kalak raja melaga memerèntah kalak i dekket kejam. Aku, JAHOWA Pergegoh Sisotercodi ngo simendokken i.”

⁵Laè Nil pè makin surut janah makin ndekkahna makin ngkerrah.

⁶Bau mangir mo dahan-dahan laè i, tikan makin marsak laèna. Males mo arngo dekket dukut-dukut.

⁷Gabè ngkerrah mo karina penamèèn i arur Laè Nil, nai ikabangken angin mo.

⁸Karina perikan sincemmal merikan i laè i mendeherreng janah tangis kumerna oda nè merguna kail dekket jalana. Mendellè mo bak pertenun;

⁹bonek janah mendellè mo kalak i deket siupahenna.

¹¹Moto kalohon ngo pengulu-pengulu kuta Zoan! Kalak Mesir simpantasna mengajarken kemotoen! Beranisu kalak i mendokken taba raja, ukum kalak i nina pemparen simpantas janah raja-raja ngo arnia!

¹²Alè raja Mesir, idikè ngo pemeddahi raja simpantas i? Tah bakunè ibettoh kalak i ngo kadè sura-sura JAHOWA Pergegoh Sisotercodi taba Mesir.

¹³Jelma lengah ngo pengulu-pengulu Zoan dekket Memfis. Oda ngo menguluken mi simerandal kalak i, tapi mengelalingken bangsana ngo.

¹⁴JAHOWA ngo memaing kalak i merèken ajar membingungken. Kumernanai salah sunggerrih ngo Mesir janah jumemba-jemba bagè jelma mabuk, tersundalih i babo utahna.

¹⁵Oda lot nè mergegoh i Mesir, penguasa bang pè jelma nterrem, kalak pandè bang pè jelma keteremmen.

¹⁶Roh mo tikkina bangsa Mesir bagè daberru percikcik janah perbiar. Menggirgir janah buradan ngo kalak i menengen JAHOWA Pergegoh Sisotercodi ipekustang kessa tanganNa menghukum kalak i.

¹⁷Gabè kegontaren kalak Mesir ngo tanoh Juda gennep ipesèngètken bai kalak i keputusen JAHOWA Pergegoh Sisotercodi tersèngèt kalak i.

¹⁸Tikan bagidi, ipakkè mo kata Heber i lima kuta Mesir. Mermangmang mo kalak sinisidi merkitè gerar JAHOWA Pergegoh Sisotercodi. Sada ibas kuta i nai igerari “Kuta Mataniari”.

¹⁹Tikan bagidi, lot mo sada langgaten bai JAHOWA iposong nagerri Mesir, janah i perbalengenna sada tihang batu bai JAHOWA.

²⁰Langgaten dekket tihang i mo dosken pertanda hadep ngo JAHOWA Pergegoh Sisotercodi i Mesir. Mula itendes bangsa i, janah dilo-dilo kalak i mengido urup bai JAHOWA, nai ipasulak mo lot sada kalak lako paluahken kalak i.

²¹Ipacidah JAHOWA mo dirina bai kalak Mesir, nai itandai janah isembah kalak i mo ia, ninganna merembah pèlèen tabasa. Merpadan mo kalak merkitè bu- laban tabasa, janah iulaken.

²²Ihajar JAHOWA ngo bangsa Mesir, tapi enggo kessa i ipemalum nola mo kalak i. Tobat mo kalak i bai JAHOWA, gabè idengkohken mo sodip kalak i ninganna ipemalum.

²³Tupung ari i lot mo dalan mbellen i Mesir nai mi Assur. Merulak molih mo jelma pengisi sidua nagerri i arap dalan i janah gabè rebbakken menguèi JAHOWA ngo kalak i.

²⁴Tupung ari i dos mo hangga Israel dekket Mesir bak Assur, janah bangsa sitellu i gabè pasu-pasu bai suberri dunia.

²⁵Ipasu-pasu JAHOWA Pergegoh Sisotercodi mo kalak i, nina mo, “Kupasu-pasu ngo kono alè Mesir bangsangKu, bang Assur sikuhanaken dekket Israel bangsa sikupilih i.”