Read Batak Dairi Jesaya 2 Bible Online

Jesaya 2 - Batak Dairi bible

Jesaya 2

¹Bagèèn ngo pendokken JAHOWA tersèngèt Juda dekket Jerusalem sinijalo si Jesaya anak si Amos:

²Ipodi ari uruk Bages JAHOWA sindates i janah ntegguh cènder i babo delleng janah uruk-uruk. Karina bangsa merkolan-kolan roh mi sidi,

³karina kalak i mendokken, “Ita kènè mo menangkeng mi Uruk JAHOWA mi bages Dèbata kalak Israel. Iajarken ngo banta kadè sipatut bahanenta. Siekutken mo dalanNa kumara i Jerusalem nai ngo roh peddah JAHOWA, mengerana ngo ia i Sion nai.”

⁴Ia ngo menghukumi i tengah-tengah bangsa, dekket memutusken perkara i tengah marga-marga gennep bangsa. Iteppa mo peddang gabè èpen bajak, dekket kujur ibaing gabè pemotik. Bangsa-bangsa oda nèngè mersijuhapen, oda ma merkebbas lako mergeraha.

⁵Alè pinempar si Jakob, merdalani mo kita ipas cuhaya JAHOWA!

⁶Ialè Dèbata, enggo itadingken ko bangsaMu, pemparen si Jakob! Kumarna barang i dikè sambing i nagerri èn enggo memakè hèlmu dunia siroh i kebincaren dekket i Palistin nai. Enggo icodi jelma adat bangsa sidèban.

⁷Nagerrina dom pirak dekket emmas, janah lahlah ngo hartana. Kudana mbuè ka- lohon, janah kurètana pè oda terètong buèna.

⁸Barang idikè pè lot gana-ganaen, janah isembah kalak i ngo gana-gana sinibahan kalak i.

⁹Gennep jelma ilèai janah ihina. Ulang ampuni kalak i alè JAHOWA!

¹⁰Ciboni mo kalak i mi liang-liang batu mamak, barang mengkurak geddung, asa maluah ipas laga JAHOWA nai dekket ibas kuasaNa simermulia i nai.

¹¹Ipeterruh ngo kalak sijukkat janah sindates ukur gabè ipetunduk. Pellin JAHOWA ngo patut pesangapen.

¹²Tupung ari i ipeterruh JAHOWA Pergegoh Siso tercodi i ngo karina sipedatesken dirina dekket menghukum karina kalak sindates merukur.

¹³Kayu arès ndates i Libanon dekket karina kayu mbellen i Basan kennah irumpakken.

¹⁴Delleng dekket uruk-uruk kennah icoco.

¹⁵Palas ndates dekket pagar batu mahan bèntèng kennah irumpakken.

¹⁶Keppel simerandalna dekket simbelgahna kennah ikaramken.

¹⁷Kalak jukkat kennah ipecerrep janah kalak sindates ukur ipetunduk. Pellin JAHOWA ngo kessa ipesangap.

¹⁸Gana-ganaen pè mersep mo karina.

¹⁹Mula kèkè JAHOWA mendegger tanoh èn, ciboni mo jelma mi liang-liang delleng batu mamak barang mengkurak lubang i tanoh asa maluah ipas laga JAHOWA nai dekket ipas kuasaNa simeheji i nai. Mula dapet kessa mo ari i, itadingken kalak i mo gana gana pirak dekket emmas siniteppa kalak idi mahan sembahenna, ibelli mo bagi lako bai menci dekket rengkaber.

²²Jadi, ulang harapken jelma simangko-angko, ai oda ngo maharga i.