Read Batak Dairi Jesaya 20 Bible Online

Jesaya 20 - Batak Dairi bible

Jesaya 20

¹Merkitè perèntah si Sargon raja Assur, ijuhap pakalima soridadu Assur mo kuta Asdod, imo sada kuta Palistin.

²Tellu tahun nai tikan madèng i, ipasulak JAHOWA mo si Jesaya anak si Amos menalkasi cipatuna dekket oles goni sinipakèna. Iuèi ngo i janah lubus mo ia merdalan janah oda mercipatu.

³Tikan ikubu kuta Asdod, nina JAHOWA mo, “Enggo tellu tahun lubus naposongku si Jesaya dekket oda mercipatu. Idi mo pertanda kadè sinaing masa mi Mesir bak Sudan.

⁴Itaban raja Assur mo jelma i dua nagerri i nai, iiring mo kalak i lubus. Tua-tua barang poso dèng pè, karinana merdalan oda merbaju bak alas nèhè bang omba-ombana pè taridah, lako mengelèai Mesir.

⁵Bonek dekket salpun mo harapen kalak simengasangken Sudan dekket simenggegahken Mesir.

⁶Tikan bagidi, idokken kalak simerian i biding laut mo, ‘Tengen mo bakunè simasa taba bangsa sisiasangken mengurupi kita meradepken raja Assur. Bakunè nè mo permaluahta?’ ”