Read Batak Dairi Jesaya 21 Bible Online

Jesaya 21 - Batak Dairi bible

Jesaya 21

¹Bagèen ngo tennah tersèngèt Babel: Bagè angin kalisungsung merdengung arap gurun pasir, bagi ngo pekiroh mara i nagerri mahantu nai.

²Aku mengidah alaten tersèngèt simasa ntengam kalohon; tersèngèt penelbuhen dekket pengeripasenken. Merdalan mo ko alè Elam, juhap mo! Alè tenterra Madai, kubu mo! Ipetadi JAHOWA mo kinidersa sinibaing Babel.

³Alaten i memaing aku bingung sanga oda nè merpendidah barang mendengkoh nèngè. Buradan aku janah berniten bagè sada kalak daberru naing ketaring.

⁴Bulisah ukurku; perasaen buradan maing aku menggirgir. Berngin sikutedohken pellin maing aku gabè buradan.

⁵Kuidah ma mo pertamuèen pèsta sienggo ihantari; bekkas kundul bai sinidilo enggo mèma. Mangan mènum mo kalak i. Sintempu terdengkoh perèntah: “Alè lubalang-lubalang! Pèmaken tambeng-tambengmu!”

⁶Nai idokken JAHOWA mo taba aku, “Pasulak mo sada kalak perjaga janah dokken ibagahken kadè idah.

⁷Mula idah nuhnuhen merkuda dua-dua kalak, nuhnuhen memasang kalodè dekket unta, kennah selloh iperdatèken.”

⁸Nai idokken perjaga i mo, “Tuan, enggo merjaga-jaga aku gennep ari mahar ari berngin.”

⁹Tengen, idi mo kalak i! Nuhnuhen merkuda roh dua-dua kalak. Kessa i ibagahken perjaga i dèng ma, “Enggo talu Babel! Gana-ganaen sembahen kalak i pè enggo mereppuk bana mersara-sara i tanoh.”

¹⁰Alè bangsangku Israel! Enggo idedohi dekket ierrik kono bagè buah gandum. Bagèndari kubagahken bamu berita selloh bai JAHOWA Pergegoh Sisotercodi Dèbata Israel nai.

¹¹Bagen ngo tennah tersèngèt Edom. Lot mo kalak dilo-dilo taba aku i Edom nai, “Alè perjaga, ndekkah dèng ngo berngin èn? Piga jom nai tikan madèng sicegen?”

¹²Kualoi mo, “Nterrang nè mo ari, tapi tong ngo gellap. Mula naing kusonmu, roh mo ko mengkuso nola.”

¹³Bagen ngo tennah tersèngèt Arab: Alè kalak Dedan, mermalam i rambah tanoh Arab mo kapilah-kapilahmu.

¹⁴Kènè pengisi tanoh Tèma, berrèken ènumen taba kalak simuasen siroh mendahi ko, janah berrè mangan kalak simperrus.

¹⁵Kumarna merberrus ngo kalak i ipas pedang sintak nai, ipas cèur sinitangging dekket ipas geraha mbellen nai.

¹⁶Nai idokken JAHOWA mo taba aku, “Sitahun nai, salpun mo kesangapen Kedar.

¹⁷Jelma mahantu ngo karina perpanah kalak Kedar. Tapi pellin cituk ngo kessa kalak i maluah. Aku JAHOWA Dèbata Israel ngo simendokken i.”