Read Batak Dairi Jesaya 22 Bible Online

Jesaya 22 - Batak Dairi bible

Jesaya 22

¹Bagèn ngo tennah tersèngèt Napa Alaten: Alè pengisi Jerusalem, kasa laus kè karina mi babontarum?

²Oda patut suberri kuta merkerja kerja dekket meroang-oang. Kumarna lubalang-lubalangmu simatè tikan geraha èn, oda ngo matè kumarna juhap.

³Karina pakalimamu mperrus dekket itaban sinderrang madèng sanga itèmbakken kalak i panahna. Karina jelma simergegohmu tertaban ngo tukasi pè enggo ndaoh kalak i mperrus.

⁴Ulang tengen aku; belli kutangisi jelma sienggo matè i bangsangku i nai. Ulang cuba apoi aku.

⁵Enggo kin ngo itentuken JAHOWA Pergegoh Sisotercodi ari èn ari kegutturen, kegontaren dekket huru-hara i Napa Alaten. Pagar batu kuta pè enggo irumpakken. Tenggo-tenggo mengido urup merginoling i delleng delleng.

⁶Roh mo kalak Siria merkuda dekket merkurèta perang, kalak Elam mersinjataken panah, kalak Kir memakè tambeng-tambengna.

⁷Lembeng-lembeng Juda singgabur i dom kurèta perang. Tenterra merkuda enggo mèma i pèntu pengkeruhen Jerusalem.

⁸Enggo merumpak karina pertahanen Juda. Tikan bagidi iperèso kènè mo sinjata ndènè i gudang sinjata.

⁹Idah kènè mo mbuè kalohon rettak i pagar batu kuta Jerusalem siperlu ipelias. Iperèso kènè karina bages i Jerusalem, irumpakken mo barang piga i sidi nai janah kipakè batuna lako pekadèken pagar batu kuta i. Lako pepulungken laè,

¹¹ibahan kènè mo bendar i tengah kuta i, janah mengarirken mi sidi laè i bendar lama nai. Tapi oda iperdatèken kènè Dèbata sienggo ndekkah menura-nurai i karina dekket pesautken simasa i.

¹²Tikanna bagidi idokken JAHOWA Pergegoh Sisotercodi mo kènè tangis dekket derru-derru, mencukkur takal dekket me- makè kaèn goni.

¹³Tapi balikna, mersennang-sennang dekket merpèsta nola ngo kènè. Isembellih kènè ngo lembu dekket biri-biri, kipangani gulè dekket mènum anggur ninganna dilo-dilo, “Roh mo kènè asa mènum kita, kumarna baremben matè mo kita!”

¹⁴JAHOWA Sindatesna dekket Perkuasa pacidahken dirina bangku janah mendokken, “Tuhu-tuhu; oda nè kuampuni kejahaten kalak i soh matè ia. Aku, JAHOWA ngo simendokken i.”

¹⁵JAHOWA Pergegoh Sisotercodi pasulakken aku mendahi si Sebna, èkuten naposo istana, lako pesohken tabasa tennah JAHOWA bagèen,

¹⁶“Isè ngo ko dok atèmu? Kadè hakmu asa ipahat ko kuburenmu i delleng batu?

¹⁷Jaga, kupatakken mo ko ndaoh-ndaoh. Kusokkik mo ko janah kugolong-golong, nai kugoling mo ko bagè gol mi nagerri mbellen. Isidi mo ko matè i gembar kurèta-kurèta asang-asangmu. Enggo melamun ibaing ko gerar tuanmu.

¹⁹Kumernana i Kupengadi mo ko ipas ulaenmu nai janah kupesampur ko ipas pangkatmu ndates i nai.

²⁰Tupung ari i kudilo mo naposongKu si Elyakim anak si Hilkia.

²¹Pesemen dekket pènggangmu Kupakèken mo bana. Karina kuasamu Kuberrèken bana. Ia mo gabè èkuten bai pengisi Jerusalem dekket Juda.

²²Merkuasa tuhu-tuhu mo ia iterruh raja pemparen si Daud. Ia mo menjèmak anak konci kerajaen. Mula ibuka ia kessa, oda lot kalak sindorok memèntu, janah mula enggo ipèntu ia, oda lot sindorok memuka.

²³Kuberrèken mo bana kuasa ntegguh bagè binangun pasek ntegguh i pagar batu. Karina kadè-kadèna ipesangap kumernaken ia.

²⁴Tapi sincelketna gabè boban bana. Mergantung bana mo kalak i, bagè koden bak saruam sinirangkè i binangun i.

²⁵Mula masa kessa i, ntalkas janah mbulak mo binangun sinipasekken ntegguh i. Idi mo perpodi kadè-kadè bak karina kalak mergantung tabasa. Aku, JAHOWA ngo simendokken i.”