Read Batak Dairi Jesaya 24 Bible Online

Jesaya 24 - Batak Dairi bible

Jesaya 24

¹Iago JAHOWA mo tanoh èn, nai gabè ndagal bana melongo. Ipebalik mo sisik tanoh èn janah isèrak mo jelma pengisina.

²Karina jelma dos ngo nasip jalonkenna; imam-imam barang ginemgem, hamba sinitokor bang èkuten, bèak barang ncor.

³Ncèda mo tanoh èn janah ilala. JAHOWA ngo simendokken i janah pasti ngo masa i.

⁴Ngkerrah janah males mo tanoh èn, gabè mpersah mo suberri dunia èn. Langit dekket tanoh èn gabè rebbak mpersah mo.

⁵Melamun ngo tanoh èn kumarna ilausi jelma pengisina i perèntah Dèbata, iobah ngo sienggo itetapken janah ilupaken padan sienggo ibaing dekket kalak i soh mi amman sumendah.

⁶Kumerna i enggo isumbiahi JAHOWA tanoh èn dekket jelma pengisina ihukum kumerna pengelako kalak i. Ilekkup mo kalak i janah cituk nai ngo kessa raja kalak i maluah.

⁷Mèrung mo kayu anggur nai mahal mo dapet laè anggur. Nai jelma simersampang atè arnia gabè bonek mo bagèndari.

⁸Oda nè terdengkoh sora kucapi meriah dekket sora genderrang meriah. Kemeriahen kalak simerlolo-atè enggo me- ngadi.

⁹Oda lot nè mènum anggur ninganna merendè, oda lot nè simengerasai tabohna ènumen mperngis.

¹⁰Gulut karina kuta; karina pèntu bages terkonci kerna buradan simengianisa.

¹¹Karina kalak mersurak i gennep dalan kerna enggo kerri laè anggur. Oda lot nèngè sampang atè i nagerri i soh mi amman sumendah.

¹²Kuta enggo melala janah pèntu pengkeruhenna enggo sompar-baèr.

¹³Bagi mo masa i suberri tanoh èn bai gennep bangsa. Tosè bagè tikan peranien, tikan ipotik buah zaitun soh kerri dekket buah anggur siperpodi ipotik i kayuna nai.

¹⁴Merendè oang-oang mo jelma simaluahna. Jelma sinikesunduten menukutken kehejien JAHOWA

¹⁵janah jelma sinikebincaren memojisa. Jelma simerian i biding laut pesangapken JAHOWA Dèbata Israel.

¹⁶I punca tanoh èn nai terdengkoh endè pemojien bai Israel, bangsa simenguèi. Tapi merjaya ngo aku! Mpersukna i aku! Penelbuh dak-dak tong menelbuh, makin menelbuhna dèng tupèh.

¹⁷Dengkohken mo alè karina jelma pengisi tanoh èn! Kegontaren, togong-togong dekket jarat ngo memèma kènè.

¹⁸Kalak simperrus ibas kegontaren nai, masuk mi togong-togong, janah kalak simaluah i togong-togong nai kennah terjarat. Udan ndor bagè icurahken i langit nai, janah dumegger mo dangaen tanoh èn.

¹⁹Rettak mo tanoh èn, mereppuk janah mogot-ogot.

²⁰Tumuyu-tuyu mo tanoh èn bagè kalak mabuk, janah mogot-ogot bagè sapo-sapo i sempul angin. Merumpak mo tanoh èn kumarna mbotong dosana. Melala mo ia, janah oda nè kèkè.

²¹Tikanna idi mo ihukum JAHOWA karina penguasa siniabang-abang i dekket karina raja i tanoh èn.

²²Ipepulung mo kalak i bagè tahanen rebbak ibas liang, janah ipemasuk mi kurungen mèma dapet tikkina ihukum.

²³Gellap mo bulan i, mataniari pè oda nè mercuhaya, kumarna JAHOWA Pergegoh Sisotercodi mo memerèntah gabè Raja. Ia mo memerèntah i Jerusalem, i babo Uruk Sion janah pacidahken kehejinNa taba pengulu bangsaNa.