Read Batak Dairi Jesaya 25 Bible Online

Jesaya 25 - Batak Dairi bible

Jesaya 25

¹Alè JAHOWA, kono ngo Dèbatangku, kupesangap ngo ko janah kupoji gerarMu. Kumarna kelengangen ngo sinibaingmu; mulai arnia nai ngo enggo isura-surai kono, janah karinana ipesaut kono.

²Enggo ilala kono kuta i; enggo merumpak kuta gotting i. Istana sinipajek sidèban enggo salpun janah oda nè ibahan soh mi amman sumendah.

³Ipoji karina bangsa simergegoh mo ko janah ikebiari karina kuta kejam.

⁴Kumarna kono mo gabè perculèndungen kalak sindotè, bekkas mènak bai jelma ncor tikan tersessak. Kono ngo perculenggemmen tupung angin sapa-sipu, perculèndungen tupung nggara ari. Kumarna menjuhap ngo jelma kejam i bagè kalisungsung tikan udan ari,

⁵bagè angin nggara i tanoh ngkerrah. Tapi kono ngo memaing sip musuh nami, ipengadi ko surak jelma-jelma kejam i, bagè hembun perculèndungen memaing bennè ari petang-peting.

⁶I Uruk Sion, ihantari JAHOWA Pergegoh Sisotercodi ngo pertamuèen bai karina bangsa i dunia èn. Ihidangken ngo pangaen simerasana dekket anggur pilihen.

⁷I babo uruk i naing ipesisi ngo hembun bonek simenangkemmi bangsa-bangsa.

⁸Ibinasaken JAHOWA Pergegoh Sisotercodi mo kematèen i soh mi amman sumendah! Iapusi mo èluh ipas gennep abè nai, janah ipedaoh kelèaen sinigongken bangsaNa i suberri tanoh èn. JAHOWA ngo simendokken i, janah pasti ngo masa bagidi.

⁹Tupung ari i idokken jelma mo ranana, “Situhuna, ia ngo Dèbatanta, Ia ngo sinipèma-pèmanta, asa ipaluah kita. Tuhu, èn ngo JAHOWA Ia ngo sinipèma-pèmanta. Bagèndari meroang-oang mo kita kumarna enggo ipaluah kita.”

¹⁰Ikelini JAHOWA ngo Uruk Sion, tapi ierrik ngo Moab bagè ronci i bekkas empak-empak.

¹¹Mado-ado mo tangan jelma pengisina i bagè tangan kalak simerlangi. Tapi ipeterruh JAHOWA mo ndates ukur kalak i gabè ndotè mo kalak i.

¹²Bèntèng-bèntèng Moab irumpakken janah itembemken mi tanoh sar-sar gabè abu.